İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 173 Hüküm no: 200 Orijinal metin no: [22a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mîrahur Mehmed Ağa’nın kethüdâsı ve vekili Hacı Yahya Bey’den borç alan Rıdvan b. Abdullah’ın muhasebesinin görüldüğü Atabe-i aliyyeden sâbıkan küçük mirahor olan iftihârü’l-emâcid ve’l-ekârim câmi‘u’l-mehâmid ve’l-mehâdim Mehmed Ağa -dâme mecduhû- kıbelinden husûs-ı âti’l-beyâna nehc-i şer‘î üzre vekâleti sâbite olup, hâlâ kethüdâları olan el-Hâc Yahya Bey b. Mehmed nâm sarrâc-ı sultânî meclis-i şer‘-i kavîm-i lâzımü’t-tekrîmde mûmâ-ileyh Mehmed Ağa’nın sâbık kethüdâları olan Rıdvan b. Abdullah mahzarında üzerine da‘vâ edip, bundan esbak mezbûr Rıdvan’ın ba‘zı mesârıfa sarf için nakden müvekkil-i müşârun-ileyh yedinden on altı kerre yüz bin ve elli sekiz bin yedi yüz on iki akçe ahz u kabz eylemişidi. El-hâletü hâzihî mesârifini ta‘yîn etmek için muhâsebesi görülmek taleb ederim dedikde, gıbbe’s-suâl merkūm Rıdvan Bey cevâbında, fi’l-hakīka müvekkil-i müşârun-ileyh yedinden vech-i muharrer üzre meblağ-ı merkūmu ber vech-i nakd bi’t-tamâm alıp kabz eylemiş idim. Lâkin min ba‘di’l-harc yedimde bir akçe ve bir habbe bâkī kalmamışdır dedikde, vâki‘ hâl hıfzan li’l-makāl vekîl-i mezbûr talebiyle ketb olundu. Tahrîren fi’l-yevmi’t-tâsi‘ min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Mafharü’l-a‘yân Muzaffer Ağa Reisü’l-muhzır, Umdetü’l-mürselîn Mehmed Efendi b. el-merhûm Emrullah, Ahmed Efendi el-Müderris ve gayruhüm.