İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 176 Hüküm no: 207 Orijinal metin no: [22b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zamaro v. Sigular’ın Seyyid Hüseyin Çelebi’den alacağını tahsil ettiği Haddâd tâ’ifesinden Zamaro v. Sigular nâm zimmî mahfil-i kazâda sâhibü’l-kitâb Seyyid Hüseyin Çelebi b. Seyyid Ali muvâcehesinde takrîr-i da‘vâ edip, mezbûr Seyyid Hüseyin bin yirmi altı senesinde İstanbul’da yava ve ispençe ve bennâk mukāta‘aları emîni olup ve benim Tershâne-i âmire’ye verdiğim demür âlâtı akçesinden on iki bin akçem olmağın, Tershâne emîni ve defterdâr temessükü ile meblağ-ı merkūmı zikr olunan mukāta‘alar akçesinden sâlyâne olunup zikr olunan temessükleri mezbûr Hüseyin Çelebi’ye teslîm etdim, meblağ-ı merkūmu el-ân bana vermemişdir, suâl olunup alıverilmesin taleb ederim dedikde, gıbbe’s-suâl mezbûr Seyyid Hüseyin zikr olunan temessükleri zimmî-i merkūm bana vermedi ve ben bi’t-tamâm meblağ-ı merkūmu merkūma edâ etdim deyû da‘vâyı def‘ edip, gıbbe’l-inkâr ve’l-istişhâd udûl-i Müslimînden Abdi Çavuş b. Hürrem, Ahmed b. Mustafa nâm kimesneler ve li ecli’ş-şehâde meclis-i şer‘a hâzırlar olup, fi’l-hakīka zimmî-i mezbûr bizim huzûrumuzda meblağ-ı merkūmu bi’t-tamâm mersûm Hüseyin Çelebi yedinden ahz etdim deyû ikrâr eyledi. Bu husûsa şâhidleriz şehâdet dahi ederiz dediklerinde, gıbbe’t-ta‘dîl şehâdetleri makbûle olmağın, mâ vaka‘a [bi’t-taleb] ketb olundu. Fî 10 Rebî‘ilâhir [sene seb‘a ve ışrîn ve elf]. Şuhûdü’l-hâl: Ahmed b. Mustafa, Mustafa Çelebi el-kâtib, Ali el-kâtib, Osman b. Abdullah.