İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 177 Hüküm no: 209 Orijinal metin no: [22b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şems Perî Hâtun’un, hissedarı Rıdvan b. Abdullah’daki alacağını tahsil ettiği Mahmiye-i İstanbul’da Sofular mahallesi sâkinelerinden Şems Perî Hâtun bt. Abdullah tarafından husûs-ı âti’l-beyâna vekîl olup, hasm-ı şer‘î-i câhid mahzarında mezbûreyi ma‘rifet-i şer‘iyye ile ârifeyn olan el-Hâc Halil Efendi b. Habil el-imâm ve Davud b. Hasan şehâdetleri ile şer‘an vekâleti sâbite olan Mustafa Çelebi b. Mehmed meclis-i şer‘de hâmilü hâze’l-kitâb Rıdvan b. Abdullah mahzarında takrîr-i kelâm edip, müvekkilem mezbûre Şems-i Pîrî Hâtun merkūm Rıdvan’dan zimmet-i şer‘îden sekiz yüz filori hissedârdır deyû da‘vâ ettikde, ol dahi inkâr etmekle beynlerinde nizâ‘ vâki‘ olmuş idi. El-hâletü hâzihî beynimizde muslihûn-ı Müslimûn tavassut edip, husûs-ı mezbûru gıbbe inkâr, hediyesi beş yüz filori kıymetli bir mushaf-ı şerîf ile yüz aded tâmmü’l-vezn sahîhü’l-ayar filoriye sulh ettiklerinde, ol dahi sulh-ı mezbûru kabûl ve bedel-i sulh olan meblağ-ı mezbûr Mushaf-ı şerîf-i ve yüz filoriyi mezbûr Rıdvan yedinden bi’t-tamâm ahz u kabz edip, husûs-ı mezbûra müte‘allik mezbûr Rıdvan’ın zimmetini âmme-i da‘vâdan ibrâ-i âm ile ibrâ etdi. Ba‘de’l-yevm husûs-ı mezbûra müte‘allik müvekkilimden da‘vâ sudûr ederse lede’l-hükkâm mesmû‘a olmaya dedikde, gıbbe’t-tasdîki’ş-şer‘î mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-hâdî aşer min şehri Rebî‘ilâhir li sene seb‘a ve ışrîn ve elf. Şuhûdü’l-hâl: El-Hâc Mustafa b. Abdullah, Mustafa b. Veli, el-Şeyh Hızır Efendi, Derviş b. Abdullah, el-Hâc İbrahim b. Hüseyin, el-Hâc Mahmud b. Ahmed, eş-Şeyh Alâaddin, el-Hâc Veli b. Bayezid ve gayruhüm.