İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 179 Hüküm no: 212 Orijinal metin no: [23a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’ya borcu olan Mehmed b. Şaban’a annesi Sâliha’nın kefîl olduğu Mahmiye-i İstanbul’da Kurukavak mahallesinde sâkine Sâliha bt. Ali nâm hâtun mahfil-i kazâda hâmiletü’l-kitâb Fâtıma bt. Mustafa nâm hâtun mahzarında ikrâr ve takrîr-i kelâm edip, mezbûr[e] Fâtıma’nın oğlum Mehmed b. Şaban zimmetinde deyn-i şer‘îden bin beş yüz akçesi olup, el-hâletü hâzihî meblağ-ı merkūma ben emr ve kabûlü hâviye kefâlet-i sahîha-i şer‘iyye ile kefîlim dedikde, mukırra-i merkūmenin ikrâr-ı meşrûhun el-mukarru lehâ’l-mersûm vicâhen tasdîk ettikden sonra işbu vesîka gıbbe’t-taleb ketb olundu. Tahrîren fi’l-yevmi’s-sânî aşer min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Halil b. Veli, Mustafa b. Abdullah, Mehmed b. Eyüb, Halil b. İbrahim.