İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 179 Hüküm no: 213 Orijinal metin no: [23a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Yusuf’un, kocası Ali Beşe b. Abdullah’tan boşandığı Mahmiye-i İstanbul’da Molla Aşkī mahallesi sâkinelerinden Fâtıma bt. Yusuf nâm hâtun mahfil-i kazâda zevc-i mutalliki olan hâmilü’l-kitâb Ali Beşe b. Abdullah mahzarında takrîr-i kelâm edip, mezbûr Ali beni tatlîk ettikde yedinde tavşan kürküne kaplı bir uzun yenli kāmışî atlas ferâcem ve bir demir sini ve bir bakır tepsi ve iki sahan ve bir şamdan ve on iki endâze keten bezim kalmış idi. Hâlâ zikr olunan eşyâ-yı mezkûremi bi’t-tamâm mezbûrun yedinden ahz u kabz edip, aslâ bir şeyim bâkī kalmadı ve zevciyyete müte‘allik âmme-i da‘âvâdan mezbûrun zimmetini ibrâ-i âm ile ibrâ etdim, ba‘de’l-yevm husûs-ı mezbûra müte‘allik benden da‘vâ sudûr ederse inde’l-hükkâmi’l-kirâm mesmû‘a ve makbûle olmaya dedikde, mukırra-i mezbûreyi ikrâr-ı meşrûhunda el-mukarru lehü’l-mezbûr bi’l-muvâcehe tasdîk edip, mâ hüve’l-vâki‘ gıbbe’t-taleb ketb olundu. Hurrire fi’l-yevmi’s-sânî aşer [min] şehri Rebî‘ilâhir sene seb‘a ve ışrîn ve elf. Şuhûdü’l-hâl: Himmet b. Mustafa, Murad b. Mehmed, Musa b. Mehmed, İsmail b. Nebi ve gayruhüm.