İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 181 Hüküm no: 215 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Çelebi’nin arazisini Ahmed Efendi’ye Efendi’ye sattığı Vilâyet-i Anadolu’da Çerkeş kazâsına tâbi‘ Tirbaşe demekle ma‘rûf karyeden olup, hâlâ mahrûse-i İstanbul’da Sarıgörez mahallesinde sâkin fahrü’l-akrân Süleyman Çelebi b. el-merhûm el-mebrûr Derviş meclis-i şer‘-i hatîr-i lâzımü’t-tevkīrde işbu râfi‘ü’l-kitâb mefharü’l-kuzât Ahmed Efendi b. el-merhûm Mustafa Efendi mahzarında bi’t-tav‘ ve’r-rızâ ikrâr ve takrîr-i kelâm edip, kazâ-i mezbûra tâbi‘ Alan ili? nâm karyede vâki‘ etrâfı İvaz b. ( ) mülkü ve cebel ve tarîk-i âm ile mahdûd mülk yerimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müşârun-ileyh Ahmed Efendi’ye beş yüz nakd-i fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip, meblağ-ı mezkûru mahallinde kabza müşterâ-yı merkūmı taslît ettikden sonra, yine karye-i merkūma haddinde Bayburd oğlu yeri demekle ma‘rûf mevzi‘de vâki‘ inde’l-ahâlî her biri ma‘lûmü’l-hudûd ve’l-mikdâr olup mutasarrıf olduğum ve yarım kile ile cümlesi beşer müd tohum isti‘âb eder arâzînin hakk-ı tasarrufunu sâhib-i arz ma‘rifetiyle mûmâ-ileyh Ahmed Efendi’ye tefvîz edip, ol dahi tefevvüz ve kabûl ettiğinden sonra mukābele-i tefvîzde yedinden iki bin beş yüz nakd-i mezbûrü’n-nakid akçe ahz u kabz eyledim. Ba‘de’l-yevm mârrü’z-zikr arâzî müşârun-ileyh Ahmed Efendi’nindir, sâir emsâli tasarrufu gibi mutasarrıf olsun dedikde, mukırr-ı mezbûrun vech-i mübîn üzre cârî olan ikrâr ve takrîrini mûmâ-ileyh Ahmed Efendi bi’l-muvâcehe tasdîk edicek, mâ vaka‘a bi’t-taleb ketb olundu. Tahrîren fi’l-yevmi’s-sâlis min şehri Rebî‘ilâhir sene seb‘a ve ışrîn ve elf. Şuhûdü’l-hâl: Fahrü’l-kuzât Hasan Efendi b. Sinan, Fahrü’l-kuzât Mustafa Efendi b. Sun‘ullah Efendi, Mustafa b. Ali el-müsta‘id, Fahrü’l-kuzât Ahmed Efendi b. İsa, Mustafa Efendi b. Mehmed el-müsta‘id, Mustafa Çavuş b. Ali, Zahrü’l-kuzât Receb Efendi, Atâullah Efendi el-mülâzım, Küçük İdris Efendi el-müderris, Ali Çelebi b. Mehmed el-müsta‘id.