İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 180 Hüküm no: 214 Orijinal metin no: [23a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Halil’in verâsetinin varislerine dağıtılması Mahmiye-i İstanbul’da Sinan Ağa mahallesinde vefât eden Ayşe Hâtun bt. Halil verâseti zevc-i metrûki Ahmed b. Ali’ye ve vâlidesi Sâime Hâtun bt. Ahmed ve li ümm karındaşları Mehmed ve Mustafa ve Osman sagīrlere münhasıra idiği zâhir ve müte‘ayyin ve mezbûre Sâime sıgār-ı mezbûrenin kıbel-i şer‘de mansûbe vasîleri olduğu bâhir ve mütebeyyin oldukdan sonra mahfil-i kazâda merkūm Ahmed ve mezbûre Sâime takrîr-i kelâm edip, müteveffât-ı mezbûrenin muhallefâtından mahalle-i mezbûrede vâki‘ bir tarafı İbrahim Çelebi mülkü ve iki tarafı Medine-i Münevvere fukarâsına vakıf olan menzil ve bir tarafı tarîk-i hâs ile mahdûd olup, içerisinde fevkānî ve tahtânî iki bâb beyti ve su kuyusunu ve muhavvatayı ve taşrasında bir bâb fevkānî beyti ve iki sofayı ve kenîfi müştemil olan on sekiz sehim menzilden her birinin hissesi takrîr ve ketb ve terkīm olunmak için kıbel-i şer‘den ehl-i hibre ile üzerine varılmak taleb ederiz dediklerinde, fahrü’l-müderrisîn Mevlânâ Ahmed Efendi ve Hâssa mi‘mârlardan Üstâd Ali b. Abdullah ve Üstâd Mustafa b. Abdullah irsâl olunup ol dahi diğer kitâbda mastûrü’l-esâmi olan Müslimîn ile mahall-i mezbûra varıp, verese-i merkūme muvâcehesinde nazar ettiklerinde mi‘mârân-ı mezbûrân menzil-i mezbûrun cümlesini otuz üç bin yirmi akçe bahâ takdîr ettiklerinde, menzil-i mezbûrun taşrasında olup on altı bin beş yüz akçeye takvîm olunan bir bâb fevkānî ve tahtânî odayı ve iki sofayı ve kenîfi, zevci mezbûr Ahmed’in dokuz sehim hissesi için takdîr ve teslîm olunup ve içerisinde olup on altı bin beş yüz on akçeye takvîm olunan fevkānî ve tahtânî iki beyti ve su kuyusunu ve muhavvatayı sıgār-ı mezbûrenin ikişer sehim hisseleri ve vasîleri mezbûrenin üç sehim hissesi için takdîr ve mezbûre Sâime’ye teslîm olundukda, mezbûrlar dahi rızâlarıyla kabz ve kabûl ettiklerinde vâki‘ hâli mevlânâ-yı mezbûr mahallinde tahrîr ve mahfil-i kazâda ihbâr ve takrîr etmeğin, mâ hüve’l-vâki‘ gıbbe’t-taleb ketb olundu. Hurrire fî evâsıtı şehri Rebî‘ilâhir li sene seb‘a ve ışrîn ve elf. Şuhûdü’l-hâl: Mustafa Efendi b. Hasan, Rıdvan b. Abdullah el-müezzin, Ali b. Musa, Ömer b. Abdullah, Mehmed b. Mustafa ve gayruhüm.