İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 182 Hüküm no: 217 Orijinal metin no: [23b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş Efendi b. Kasım’ın eşiyle ortak olduğu arsa ve evini Osman Çavuş’a sattığı Fahrü’l-müderrisîn Derviş Efendi b. Kasım kendi tarafından asâleten zevcesi Havva bt. Mehmed Ağa tarafından husûs-ı âti’l-beyâna vekîl olup, hasm-ı câhid mahzarında mezbûreyi ma‘rifet-i şer‘iyye ile ârifeyn olan Mehmed b. Ali Çavuş b. Abdullah ve Ali Çavuş b. Abdullah şehâdetiyle vekâleti sâbite oldukdan sonra vekâleten, meclis-i şer‘-i şerîfde râfi‘ü’l-kitâb Osman Çavuş b. Mehmed muvâcehesinde asâleten ve vekâleten ikrâr ve takrîr-i kelâm edip, mahmiye-i İstanbul’da vâki‘ Karakız mahallesinde bundan akdem vefât eden Marziye Hâtun bt. Mehmed Ağa’nın mahalle-i mezbûrede vâki‘ Burhan Efendi evleri demekle ma‘rûfe olan dâr-ı kebîre beyne’l-verese taksîm olundukda, müteveffât-ı mezbûrenin li eb karındaşı ve vârisi olan Sâlih Mehmed Çelebi için ta‘yîn olundukdan sonra, ben merkūm Sâlih Mehmed Çelebi’den iştirâ eylediğim bir tarafı Havva Hâtun mülküne ve tarafeyni Abdülkerim Efendi mülküne ve taraf-ı âharı İvaz Çelebi mülküne müntehî olup, arsası seksen yedi zirâ‘ olan iki bâb fevkānî evleri sekiz bin nakd-i fıddî râyic fi’l-vakt akçeye ve kezâlik hîn-i taksîmde müteveffât-ı mezbûrenin li eb kız karındaşı olup, zevcem olan merkūme Havva Hâtun’un hisse-i irs-i için menzil-i merkūmdan ta‘yîn olunan bir tarafı İvaz Çelebi mülküne ve bir tarafı merkūm Sâlih Mehmed Çelebi’den iştirâ eylediğim menzile ve tarafeyni Abdülkerim Efendi mülküne müntehî olup arsası kırk üç buçuk zirâ‘ olan ( ) müştemil evleri, yedi bin fıddî-i Osmânî akçeye asâlet ve vekâletim hasebiyle merkūm Osman Çavuş’a zikr olunan menzili bey‘-i bâtt-ı sahîh-i şer‘î ile bey‘ edip, kabz-ı semen ve teslîm eyledim, ol dahi vech-i merkūm üzre ibtiyâ‘ ve kabûl ve kabz eyledi dedikde, gıbbe’t-tasdîk ketb olundu. Hurrire fi’l-yevmi’l-âşir min şehri Rebî‘ilâhir sene seb‘a ve ışrîn ve elf. Şuhûdü’l-hâl: Fahrü’l-müderrisîn Ahmed Efendi b. eş-Şeyh Sinan, Fahrü’l-müderrisîni’l-kirâm Ahmed Efendi b. İvaz, Mustafa Efendi b. Sinan el-kadı, Abdurrahman Efendi el-kadı ve gayruhüm.