İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 182 Hüküm no: 218 Orijinal metin no: [23b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Şeyh Yakub’un Eflak asıllı kölesi Zîbâ bt. Abdullah’ı âzâd ettiğinin tescili Mahmiye-i İstanbul’da Canbâziye mahallesinde mukaddemâ vefât eden Ayşe Hâtun bt. eş-Şeyh Yakub’un veresesinden sadriye kızı Fâtıma bt. Fethullah tarafından husûs-ı âtîye vekîl olup, vekâleti nehc-i şer‘î üzre sâbite olan mefhari’l-ümerâ’i’l-kirâm Hüseyin Bey b. Mehmed vekâleten ve li ebeveyn karındaşı oğlu Ahmed Çelebi b. Mehmed asâleten ve li ebeveyn karındaşı oğlu Kadri Çelebi tarafından mezbûr Ahmed Çelebi b. Mehmed ve Mustafa b. Abdullah şehâdetleri ile vekâleti sâbite olan Ahmed Ağa b. Mustafa vekâleten, meclis-i şer‘-i şerîfde işbu açık kaşlı gök elâ gözlü Eflakiyyetü’l-asl Zîbâ bt. Abdullah muvâcehesinde ikrâr edip, mevsûfe-i mezbûre müteveffât-ı merkūme Ayşe’nin câriye-i memlûkesi olup, hâl-i sıhhatde i‘tâk ve gerden-i tasarrufâtın kayd-ı rıkdan ıtlâk etmişdir deyû ıtk-ı mezbûr asâleten vekâleten makbûlümüzdür dediklerinde, makrûn-ı mezbûrun ikrâr-ı meşrûhları el-mukarru lehü’l-mersûme vicâhen ve şifâhen tasdîk ettikden sonra, işbu vesîka gıbbe’t-taleb ketb olundu. Tahrîren fi’l-yevmi’s-sâlis min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Kemaleddin Efendi b. Seydî el-imâm, Sinan Efendi b. Ebülkasım, Sefer Efendi b. Musa, Abd[ullah] b. Mehmed, Sefer Çelebi b. Bâli, Abdülkerim b. İslâm.