İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 186 Hüküm no: 224 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Marko v. Murad’ın ekmek bedelinden borçlu olan Benyamin v. Yako ile anlaştığı Mahmiye-i İstanbul’da Cerrah Mehmed Paşa kurbunda habbâz olan Marko v. Murad nâm Ermeni meclis-i şer‘de, mahmiye-i mezbûre de Portakal-ı kebîr cemâ‘atinden işbu sâhibü’l-kitâb Benyamin v. Yako nâm Yahudi muvâcehesinde ikrâr ve ta‘bîr ani’l-merâm edip, bundan akdem Yahudi-i mezbûr zimmetinde bey‘ edivermek için verdiğim ekmek bahâsından beş bin altı yüz seksen akçe hakkım olup taleb eylediğimde, mikdârını inkâr etmeğin beynimizde münâ[za]‘ât-ı şedîde ve muhâsemât-ı ekîde vâkı‘a olmuş idi. El-hâletü hâzihî tavassut-ı muslihîn ile husûs-ı mezbûr üç bin üç yüz akçeye sulh olunup, ben dahi sulh-ı mezbûru kabûl ve bedel-i sulh olan meblağ-ı merkūmu bi’t-tamâm Yahudi-i mezbûr yedinden alıp kabz eyleyip, zimmetini husûs-ı mezbûra müte‘allik olan cemî‘-i de‘âvî ve mütâlebât ve eymân ve muhâsemâtdan ibrâ-i âm ile ibrâ ve ıskāt-ı hak eyledim. Ba‘de’l-yevm mazmûn-ı kitâba muhâlif benden veya vekîlimden da‘vâ sâdıre olursa lede’l-hükkâm mesmû‘a ve makbûle olmaya dedikde, mukırr-ı mezbûru ikrâr-ı meşrûhunda Yahudi-i mersûm vicâhen tasdîk edicek, mâ hüve’l-vâki‘ gıbbe’t-taleb ketb olundu, yed-i tâlibe def‘ olundu. Tahrîren fi’l-yevmi’r-râbi‘ aşer min şehri Rebî‘ilâhir li sene seb‘a ve ışrîn ve elf. Şuhûdü’l-hâl: eş-Şeyh Abdurrahman b. Mehmed, el-Hâc Ali b. Hüseyin, Musa Bey b. Abdullah, Mustafa b. Cafer, İbrahim b. Mehmed.