İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 186 Hüküm no: 225 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Ayşe Hâtun bt. Şeyh Yakub’un varislerinin anlaştıkları Mahmiye-i İstanbul’da Canbâziye mahallesinde vefât eden Ayşe Hâtun bt. eş-Şeyh Yakub Efendi’nin veresesinden li ebeveyn karındaşı oğulları Ahmed Çelebi b. Mehmed asâleten ve karındaşı Kadri Çelebi b. Mehmed tarafından husûs-ı âti’z-zikre vekîl olup, mezbûr Ahmed Çelebi ve Mustafa b. Abdullah şehâdetleri ile vekâleti sâbite olan Ahmed Ağa b. Mustafa vekâleten mahfil-i kazâda müteveffâ-yı merkūmenin sadriye kızı fahrü’l-muhadderât Fâtıma Hâtun bt. Fethullah’ın zevci ve tarafından tasdîk-i âtîye vekîl olup, mezbûreyi ma‘rifet-i şer‘iyye ile ârifeyn olan Mehmed Subaşı b. Mehmed ve el-Hâc Sinan b. Abdullah şehâdetleri ile hasm-ı câhid mahzarında vekâleti sâbite olan fahrü’l-ümerâ’i’l-kirâm Hüseyin Bey b. Mehmed muvâcehesinde ikrâr ve takrîr-i kelâm edip, merkūme Ayşe Hâtun vefât ettikde cümle muhallefâtına müvekkile-i merkūme vaz‘-ı yed edip, muhallefâtından mahalle-i merkūmede vâki‘ bir tarafı Sefer Bey b. Abdullah mülkü ve bir tarafı Hasan b. Mustafa mülkü ve bir tarafı ( ) vakfı ve taraf-ı râbi‘i tarîk-i âm olan menzilini kızı mezbûre Fâtıma Hâtun’a hâl-i sıhhatinde hibe ve temlîk edip, hibe-i mezbûre cümle verese mukbûlü oldukdan sonra sâir muhallefâtdan asîl-i mezbûra ve müvekkil-i mezkûra âid olan hisse-i şer‘iyyelerin mezbûre Ayşe’den taleb eylediğim[de] mezbûre dahi nehc-i şer‘î tarîkiyle her birimize müstakillen dokuzar bin akçe verip, biz dahi asâlet ve vekâletimiz hasebiyle dokuzar bin akçeyi müvekkile-i merkūme yedinden alıp kabz edip, müteveffât-ı merkūmenin mîrâsına müte‘allik de‘âvî ve zimmetini ibrâ ve ıskāt eyledik dediklerinde, mesfûrân-ı merkūmânın asâlet ve vekâletleri hasebiyle sudûr eden ikrârları[nı] mûmâ-ileyh Hüseyin Bey dahi vicâhen tasdîk etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis aşer min [şehri] Rebî‘ilâhir li sene seb‘a ve ışrîn ve elf. Şuhûdü’l-hâl: Kemaleddin Efendi b. Seydî el-imâm, Sinan Efendi Ebülkasım el-imâm, Sefer Efendi b. Musa, Abdülkerim Bey, Ahmed Çelebi b. Bâli.