İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 191 Hüküm no: 232 Orijinal metin no: [25a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şah Huban Hâtun’un Payidar Hâtun’a iade ettikten sonra ölen câriye için ödediği parayı istemesi Mahmiye-i İstanbul’da Arabacı Bayezid mahallesinde sâkine Şah Huban bt. Mustafa nâm hâtun mahfil-i kazâda Payidar bt. Abdullah nâm hâtun muvâcehesinde ikrâr ve takrîr-i kelâm edip, bundan akdem mezbûre Payidar’dan altı bin dört yüz akçeye Marya nâm Rûsiyyetü’l-asl bir câriye iştirâ edip, ayb-ı şer‘îsi olmağla bahâsını reddedmek üzre câriye-yi mezbûr Payidar’a teslîm edip, ol dahi fesh-i bey‘ kabûl ve kabz eyledi idi. Ba‘dehû câriye-i merkūme mezbûre Payidar yedinde bi emrillâh vefât eylemeğin, hâlâ câriye-i mezbûre için def‘ eylediğim meblağ altı bin akçe alıverilmesin taleb ederim dedikde, gıbbe’s-suâl ve akībü’l-inkâr, müdde‘iyye-i merkūmeden da‘vâsına mutâbık beyyine taleb olundukda, izhâr-ı acz edip alâ vefki’l-mes’ûl merkūm Payidar’a yemîn [teklîf olundukda yemîn] etmeğin, kayd olundu. [Tarih yazılmamıştır]. Şuhûdü’l-hâl: El-Hâc Mehmed b. Lütfi, Ali b. Abdullah, Halil b. Abdullah.