İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 190 Hüküm no: 231 Orijinal metin no: [25a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Hıdır Ağa’nın küçük kızı Fâtıma’ya intikâl eden çiftliğin işletildiği Vilâyet-i Rumeli’nde Niş nâm kasabada bundan akdem vefât eden Hıdır Ağa’nın sulbiye sagīre kızı Fâtıma’nın tesviye-i umûruna vasiyy-i muhtârı olan Hasan Çavuş b. Abdullah meclis-i şer‘de Yusuf b. Abdullah mahzarında takrîr-i da‘vâ edip, bundan akdem ben âhar diyâra gittiğimde sagīre-i mezbûrenin babasından intikāl eden havâss-ı Kostantıniyye kazâsına tâbi‘ Kulfal nâm karyede vâki‘ olan çiftliği zabt için merkūm Yusuf’u tarafımdan vekîl edip, zikr olunan çiftlik için olan kıymetleri ilm-i şer‘î ile ma‘lûm yedi re’s su sığırı öküzü ve bir su sığırı ineği ve yirmi sekiz aded kara sığır öküzü ve beş kara sığır ineği ve iki dana ve üç tosun ve bir kara sığır boğası ve dört buzağı ve der-anbâr altı müd buğday ve bir müd alef ve bir müd darı ve on keyl arpa teslîm ettiğimden mâ‘adâ, yine sagīre-i merkūme mâlından istirbâh eyle deyû yirmi bin nakd akçe verip merkūm dahi kabz ettikden sonra, sagīre-i merkūmenin karye-i mezbûrede vâki‘ iki bâb menzilini fuzûlî bin dokuz yüz akçeye bey‘ edip kabz-ı semen eylediğinden mâ‘adâ, zikr olunan çiftliğin bostanını üç sene zabt etmekle ne mikdâr mahsûl kabz eylemişdir suâl olunmak murâd ederim dedikde, gıbbe’s-suâl merkūm Yusuf cevâbında, fi’l-vâki‘ merkūm Hasan Çavuş mârrü’z-zikr olan çiftliği zikr olunan mevâşî ve altı müd buğday ve bir müd alef ve bir müd darı ve on keyl arpa ile bana teslîm edip, ve fi’l-hakīka sagīre-i merkūme mâlından yirmi bin akçe dahi verip ben dahi kabz eyledim ve sagīre-i merkūmenin karye-i mezbûrede vâki‘ iki bâb menzilini bin dokuz yüz akçeye bey‘ ve kabz-ı semen etdim ve zikr olunan bostanı üç sene tasarruf etdim, lâkin bir sene ancak bin beş yüz akçe mahsûl kabz etdim, bir seneden gayri nesne hâsıl olmadı deyicek, mâ vaka‘a kayd şüd. Tahrîren fi’l-yevmi’l-ışrîn min şehri’l-mezbûr. Şuhûdü’l-hâl: Hüsrev b. Abdullah, Yusuf b. Abdullah, Şaban b. Abdullah, Mehmed b. Hüseyin, el-Hâc Hasan ve gayruhüm.