İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 193 Hüküm no: 236 Orijinal metin no: [25b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kâtib Bâli Vakfı’na ait evin tamir şartıyla Hüseyin Çelebi’ye kiralanması Mahmiye-i İstanbul’da merhûm Kâtib Bâli vakfına bi’l-fi‘il mütevellî olan fahrü’l-eşbâh Ali Bey b. Abdullah meclis-i şer‘de takrîr-i kelâm edip, merhûm-ı mezbûrun vakfından mahmiye-i mezbûrede Kızıltaş mahallesinde vâki‘ bir tarafı Mehmed Çavuş b. Abdullah mülkü ve bir tarafı vakf-ı mezbûr ve iki tarafı Ali Ağa mülkü ile mahdûd olan menzil mürûr-ı eyyâm gürûr-ı şuhûri a‘vâm ile harâb ve sakf ve çardağı mâil-i turâb olup, cânib-i vakıfda ta‘mîrine müsâ‘ade olmayıp, ihmâl olunduğu takdîrce arsa-i hâliye kalması mukarrerdir, kıbel-i şer‘den ehl-i hibre ile üzerine varılıp nakz-ı takvîm ve arsasının ne mikdâr mukāta‘aya tahammülü vardır ketb ve terkīm olundukdan sonra, icâre-i mu‘accele ve müeccele ile âhara îcâr etmek murâdımdır dedikde, savb-ı şer‘den mefharü’l-mülâzımîn Mevlânâ İsmail Efendi b. Ömer ve hâssa mi‘mârlardan Ali Bey b. Abdullah irsâl olunup, ol dahi zeyl-i kitâbda mastûrü’l-esâmi olan Müslimîn ile mahall-i mezbûra varıp nazar ettiklerinde, fi’l-hakīka menzil-i mezbûr harâb olup, kābil-i süknâ olmadığı müşâhid olmağın, mi‘mâr-ı mezbûr nakzına ba‘de’l-mesâha on bir bin dört yüz altmış akçe takdîr-i bahâ ve ta‘yîn-i kıymet eyleyip, arsasını dahi mesâha ettikde bi hesâb-ı şatrancî iki yüz yirmi beş zirâ‘ olup, her sene yüz elli akçe mukāta‘adan ziyâdeye tahammülü yokdur deyû sâir ehl-i vukūf Müslimîn ittifâkıyla haber verildikden sonra mütevellî-i mezbûr, menzil-i mezkûrı cümle tevâbi‘ ve levâhıkıyla mahalle-i mezbûra sâkinelerinden fahrü’l-muhadderât zahrü’l-muvakkarât Bâdıreftâr Hâtun bt. Abdullah tarafından husûs-ı âti’z-zikre vekîl olup, nehc-i şer‘î üzre mezbûreyi ma‘rifet-i şer‘iyye ile ârifeyn olan Receb Bey b. Veli el-cündî ve Mustafa b. Kurd er-râcil şehâdetleri ile şer‘an vekâleti sâbite olan fahrü’l-a‘yân Hüseyin Çelebi b. Abdi’ye otuz bin akçeye icâre-i mu‘accele ve her sene yüz elli akçe icâre-i müeccele ile târih-i kitâbda îcâr edip, ol dahi müvekkilesi için istîcâr ve kabûl ettikde, zikr olunan otuz bir bin akçeyi mütevellî-i mezbûr vakıf için yedinden ahz u kabz edip akd-i îcâre tamam oldukdan sonra mütevellî-i mezkûr müste’cir-i merkūmeye arsa-i mesfûre üzerine kendü mâlıyla mülkü olmak üzre mücerred ebnâya izin verdikde, vâki‘ hâli mevlânâ-yı müşârun-ileyh mahallinde tahrîr ve mahfil-i kazâda ihbâr ve takrîr edip, ihbârı mevki‘-i kabûlde vâki‘ olmağın, kıbel-i şer‘den dahi minvâl-i muharrer üzre izn-i şer‘î verilip, mâ hüve’l-vâki‘ gıbbe’t-taleb ketb olundu. Hurrire fi’l-yevmi’l-ışrîn min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Pervâne Ağa b. Abdullah, Hüseyin Ağa b. Mehmed el-müteferrika, Ahmed Ağa b. Hüseyin, Süleyman Bey b. Abdullah, Ferruh Bey b. Abdullah, Abdullah b. Ferruh, İbrahim b. Ahmed, el-Hâc Emrullah en-nüvvâb, Piyâle Bey b. Abdullah ve gayruhüm.