İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 194 Hüküm no: 237 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mîrâsa dâhil edilmek istenen Rus asıllı Kamer’in ölen Mustafa’nın eşi Rahime Hâtun’un câriyesi olduğu Mahmiye-i İstanbul’da Hoca Hayreddin mahallesinde mukaddemâ vefât eden Mustafa b. İsa’nın li ebeveyn karındaşı oğlu ve vârisi İlyas nâm kimesnenin husûs-ı âtîye vekîl-i şer‘îsi ve vâlidesi Emine bt. Himmet mahfil-i kazâda müteveffâ-yı mezbûrun zevce-i metrûkesi ve vârisesi sâhibetü’l-kitâb Rahime bt. Veli nâm hâtun muvâcehesinde takrîr-i da‘vâ edip, işbu hâzır bi’l-meclis açık kaşlı elâ gözlü ak benizli orta boylu Rûsiyyetü’l-asl Kamer bt. Abdullah müteveffâ-yı mezbûrun câriye-i memlûkesi iken hâlâ mersûme Rahime mezbûreye mülkiyyet üzre câriye-i merkūmeye vaz‘-ı yed edip müvekkilim ile mîrâsa idhâlden imtinâ‘ eder suâl olunup ihkāk-ı hak olunmasın taleb ederim dedikde, gıbbe’s-suâl mezbûre Rahime câriye-i mezbûre benim memlûkemdir deyû da‘vâ edip, tarafeynin beyyinesi olmayıp müşkil makūlesinden olmağın fe’l-müşkil li’l-hayy ma‘a yemînihî muktezâsınca merkūme Rahime’ye yemîn teklîf olundukda câriye-i mezbûre mülkü olup kat‘â mülkünden ihrâc etmediğine yemîn billâhi’l-aliyyi’l-azîm etmeğin, câriye-i mezbûre merkūme Rahime’nin yedinde ibkā olunup, vekîl-i mersûme mu‘ârazadan men‘ olundu. Tahrîren fi’l-yevmi’l-ışrîn min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Mustafa b. Hamza, Eyüb b. Mehmed, Mehmed b. Zeynî, Hasan b. Veli.