İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 195 Hüküm no: 240 Orijinal metin no: [26a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âzâd edildiği halde câriye olarak satılan Çerkez asıllı Sâliha’yı satın alanların alacak davası Dergâh-ı âlî yeniçerilerinden Kurd Beşe b. Abdullah meclis-i şer‘-i şerîfde mahmiye-i İstanbul’da Ali Paşa mahallesi sâkinelerinden Mihmân Hâtun bt. Ömer mahzarında takrîr-i da‘vâ edip, bundan akdem mezbûre Mihmân Hâtun orta boylu karayağız açık kaşlı kara elâ gözlü Çerkeziyye Sâliha bt. Abdullah [nâm] câriyeyi mülkü olmak üzre yirmi dört bin akçeye bana bey‘ ve semenini kabz edip, ben dahi Fâtıma Hâtun’a, ol dahi Mustafa b. Mehmed’e, ol dahi Hızır Bey b. Abdullah’a, ol dahi Ayşe Hâtun’a bey‘ ve teslîm edip, mezbûre Ayşe Hâtun’un yedinde iken mevsûfe-i mezbûre Sabîha nâm hâtunun mu‘takası olduğun şer‘an isbât edip, hükm-i hâkim-i şer‘î ile sebîli tahliyye olunmağın, zikr olunan müşterilerden her biri semeni ile bâyi‘lerine rücû‘ edip, hükm-i hâkim-i şer‘ile ahz eylediklerinde, mezbûre Fâtıma Hâtun dahi câriye-i mezbûrenin semeni ile bana mürâca‘at edip emr-i hâkimi’ş-şer‘ ile benden ahz eylemeğin, ben dahi meblağ-ı merkūm yirmi dört bin akçeyi merkūme Mihmân Hâtun’dan taleb ederim dedikde, gıbbe’s-suâl merkūme Mihmân Hâtun cevâbında, ben dellâle olmağın Sabîha bt. Devran nâm hâtun câriye-i mezbûreyi mülkümdür deyû bey‘ edivermek için bana verip, ben dahi meblağ-ı merkūma müdde‘î-i mersûma kendi mülkümdür deyû ikrâr edip bey‘ ettiğimde, semen-i merkūmu yedinden ahz ve müvekkilime îsâl eyledim. Lâkin vech-i meşrûh üzre ikrârımda kâzibe olmadığım (olduğum) müdde‘î-i mezbûrun ma‘lûmu olup, iştirâ eylemişdir, ol takdîrce benim yedim yed-i husûmet değildir deyicek, gıbbe’l-istintâk müdde‘î-i merkūm mersûme Mihmân dellâle olup ve vech-i meşrûh ikrârında kâzibe değildir deyicek, mezbûre Mihmân minvâl-i muharrer üzre ikrârında kâzibe olmadığına bi’t-taleb merkūm Kurd Beşe’ye yemîn teklîf olundukda nükûl eylemekle, mezkûre Mihmân Hâtun bey‘-i merkūmda dellâle olduğu zâhir olup, yedi şer‘an yed-i husûmet olmamağın, müdde‘î-i mezbûr vech-i meşrûh üzre ta‘arruzdan men‘ olunup, mâ vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min şehri Rebî‘ilâhir li sene seb‘a ve ışrîn ve elf. Şuhûdü’l-hâl: İbrahim Çelebi b. Mahmud, Hasan Çelebi b. Mustafa, Ali Kethüdâ b. Abdullah, Muzaffer Ağa ve gayruhüm.