İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 200 Hüküm no: 248 Orijinal metin no: [27a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani Kilidbuş v. Dimo’nun evini ve tarlasını Mehmed Beşe b. Abdullah’a satması Rumeli’nde Kerbeneş nâm kasaba sâkinlerinden Yani Kilidbuş v. Dimo nâm zimmî meclis-i şer‘de, işbu hâfızu’l-kitâb Mehmed Beşe b. Abdullah er-râcil mahzarında takrîr-i kelâm edip, kasaba-i mezbûrede vâki‘ bir tarafdan Yovan v. ( ) mülkü ve bir tarafdan Dirve v. ( ) mülkü ve iki tarafdan tarîk-i âm ile mahdûd olup, bir bâb tahtânî evi ve kenîfi müştemil menzilimi cemî‘-i tevâbi‘i ve levâhıkı ile merkūm Mehmed Beşe’ye üç bin nakd-i râyic fi’l-vakt akçeye bey‘-i kat‘î ile bey‘ eyledikden sonra yine kasaba-i mezbûre civârında manastır kurbunda Yoncayeri demekle ma‘rûf bir kıt‘a tarlamın dahi ma‘rifet-i sipâhi ile hakk-ı tasarrufda tefvîz edip, mukābele-i tefvîzinde merkūm Mehmed Beşe yedinden bin nakd-i râyic fi’l-vakt akçe alıp, kabz eyledim. Ba‘de’l-yevm mâdem ki zikr olunan tarlanın a‘şâr-ı şer‘iyyesini [edâ] eyleye, keyfe mâ yeşâ mutasarrıf ola dedikden sonra, menzil-i mezbûru ve zikr olunan tarlayı mahallinde kabza mezbûr Mehmed Beşe’yi taslît eyledim dedikde, mukırr-ı mezbûrun vech-i meşrûh üzre ikrârın mezbûr Mehmed Beşe bi’l-muvâcehe tasdîk edicek, mâ hüve’l-vâki‘ bi’t-taleb ketb olundu. Tahrîren fi’t-târihi’l-mezbûr. Şuhûdü’l-hâl: Handan Ağa, Mustafa b. Yakub, Ahmed b. Mustafa, Ahmed b. Şaban, Ali Çelebi b. Mustafa.