İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 199 Hüküm no: 247 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. el-Hâc Behrâm’ın evini Ali Çelebi b. Süleyman’a satması Rumeli’de kasaba-i Pazarcık sâkinlerinden Mustafa Çelebi b. el-Hâc Behrâm nâm kimesne meclis-i şer‘-i şerîfde, işbu hâfızu’l-kitâb fahrü’l-kuzât Ali Çelebi Efendi b. Süleyman mahzarında ikrâr ve ta‘bîr ani’l-merâm edip, kasaba-i mezbûrada Akmescid mahallesinde vâki‘ bir tarafdan Hasan Bey b. Abdullah er-râcil mülkü ve iki tarafdan Hasan Efendi b. ( ) ve bir tarafdan tarîk-i âm ile mahdûd olup, bir bâb tahtânî evi ve su kuyusunu ve kenîfi ve eşcâr-ı müsmireyi müştemil olan menzilimi cemî‘-i tevâbi‘i ve levâhıkı ile müşârun-ileyh Ali Çelebi Efendi’ye üç bin nakd-i râyic fi’l-vakt akçeye bey‘-i kat‘î ile bey‘ edip, semeni olan meblağ-ı mezbûr üç bin akçeyi müşârun-ileyh Ali Efendi yedinden bi’t-tamâm ahz u kabz eyledikden sonra menzil-i mezbûru mahallinde kabza merkūm Ali Çelebi Efendi’yi taslît eyledim dedikde, mukırr-ı mezbûru ikrâr-ı meşrûhunda merkūm Ali Efendi bi’l-muvâcehe tasdîk edicek, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’s-sâdis ve’l-ışrîn min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Mustafa Efendi, Mehmed Çelebi, Muslihiddin Efendi, el-Hâc Sefer b. Osman b. Abdullah.