İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 202 Hüküm no: 252 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurşunlu Türbe Zaviyesi’ne ait evin Abdi Efendi’ye kiralanması Mahmiye-i İstanbul’da Kurşunlu Türbe zâviyesi fukarâsına mevkūf ve meşrût olup, türbe-i merkūme kurbunda vâki‘ lede’l-cîrân ma‘lûmü’l-hudûd olan menzil, bu âna gelince üçer akçeye îcâr olunup tasarruf oluna gelmiş iken, sâbıkan nişancı olan sâhibü’d-devlet ve’l-ikbâl sâhib-i ezyâli’l-ferdi’l-iclâl Abdi Efendi menzil-i mezbûra yevmî bir akçe ziyâde ücret ile tâlib olup, vakfa nef‘i olmağın, hâkim-i muvâkkı‘ı’l-kitâb tûbâ-leh ve hüsnü me’âb hazretleri menzil-i mezbûrun mütevellîsi mevcûd olmamakla, velâyet-i âmmeleri hasebiyle zikri sebk eden menzili târih-i kitâbdan bir sene tamamına değin yevmî dörder akçe icâre-i müeccele ile mûmâ-ileyh Abdi Efendi’ye îcâr ve teslîm eyleyip, ol dahi istîcâr ve kabz eyledi. Ba‘de’l-yevm müddet-i mezbûre tamamına değin keyfe mâ yeşâ mutasarrıf ola. Tahrîren fi’l-yevmi’s-sâmin ve’l-ışrîn min şehri Rebî‘ilâhir min şuhûri li sene seb‘a ve ışrîn ve elf. Şuhûdü’l-hâl: El-Hâc Ali b. Abdullah, Mehmed b. Cafer, Mustafa b. Kelâmî.