İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 203 Hüküm no: 253 Orijinal metin no: [27b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Molla Hüsrev vakfının yanan dükkânlarının inşâsı için kiracıların vakfa borç vermesi Merhûm Molla Hüsrev vakfından olup mahmiye-i İstanbul’da Bitpazarı kurbunda vâki‘ olan dekâkînler yevmî birer akçe icâre-i müeccele ve icâre-i mu‘accele-i ma‘lûme ile müste’cirleri olan Mehmed b. Ahmed ve Ahmed b. Ali ve Mehmed Çavuş b. Mustafa ve İbrahim b. Mustafa ve Hızır Bey b. ( ) ve Ramazan b. Abdullah nâm kimesneler meclis-i şer‘de, vâkıf-ı mezbûrun evlâdından olup meşrûtiyyet üzre vakfına mütevellîye olan Ayşe Hâtun bt. Haydar’ın zevci ve tarafından husûs-ı âti’l-beyâna vekîl olup, bimâ hüve nehcü’s-sübût vekâleti sâbite olan fahrü’l-kuzât es-Seyyid Mehmed Efendi b. es-Seyyid Ahmed mahzarında takrîr-i da‘vâ edip, bundan akdem mahmiye-i merkūmede hark vâki‘ oldukda zikr olunan dükkânlar muhterik olmağla, kadîmü’l-eyyâmdan olıgeldiği üzre duvar ve sakfları mâl-ı vakıf ile binâ olunmak murâd ederiz dediklerinde, gıbbe’s-suâl vekîl-i merkūm cevâbında, hâlâ vakfın mâlı olmayıp, lâkin müste’cir karz verip ba‘dehû mahsûl-i vakıfdan haklaşmak üzre imdâd ederlerse ta‘mîr edeyim dedikde, müste’cirîn-i merkūm dahi herbiri dükkânlarının binâsına vefâ edecek kadar akçe buluvermeye müte‘ahhid olduklarında, vech-i meşrûh üzre binâlarına tenbîh olunup, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min şehri Rebî‘ilâhir sene [10] 27. Şuhûdü’l-hâl: Mehmed b. Ahmed, Süleyman b. Mustafa, Ramazan b. İsmail, Mehmed b. Keyvan, Mehmed b. Cafer ve gayruhüm.