İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 204 Hüküm no: 255 Orijinal metin no: [28a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Abdülmennân’ın, Yorgi v. Todoro’daki alacağının terekesinden tahsil edilmesi Mahmiye-i Kostantıniyye’de Nöbethâne mahallesi sâkinlerinden Ahmed Ağa b. Abdülmennân ez-Zevvâku’s-sultânî tarafından husûs-ı âti’z-zikre vekîl olup, Nesimî Efendi b. Mahmud el-kadı ve Ahmed b. Veli şehâdetleri ile mahzar-ı hasm-ı şer‘îde vekâleti sâbite olan fahrü’l-müderris[în]i’l-fihâm Bayram Efendi b. Münir? meclis-i şer‘-i şerîfde, mahmiye-i mezbûrede Eski Ali Paşa mahallesinde sâkin iken hâlik olan Yorgi v. Todoro’nun li ebeveyn kız karındaşı ve bi’l-inhisâr vârisesi olan Eşko bt. Todoro’nun vekîli olup, mahzar-ı hasm-ı câhidde mezbûre Eşko’yu ma‘rifet-i şer‘iyye ile ârifeyn olan Menon v. Dimitri ve Todoro v. Nikola şehâdetleri ile isbât-ı vekâlet eden Kosta v. Todoro nâm zimmî mahzarında bi’l-vekâle takrîr-i da‘vâ edip, bundan akdem müvekkilim mezbûr Ahmed Ağa’nın hâlik-i mezbûr zimmetinde karz-ı şer‘îden kırk bin akçesi olup, kable’l-îfâ hâlik oldukda, metrûkâtına müvekkile-i mezbûre vaz‘-ı yed etmeğin, meblağ-ı merkūmu metrûkâtından vekâletim hasebiyle taleb ederim dedikde, gıbbe’s-suâl mezbûr Kosta cevâbında, hâlik-i merkūmun metrûkâtına müvekkile-i merkūme verâseti hasebiyle vaz‘-ı yed eylediğine mu‘terif olup, deyn-i merkūmu inkâr edicek, gıbbe’l-istişhâd udûl-i Müslimînden Mustafa Bey b. Sinan Efendi ve Mehmed Bey b. Nasûh Efendi mahfil-i kazâya li ecli’ş-şehâde hâzırân olup, fi’l-hakīka hâlik-i mezbûr hayâtında bizim huzûrumuzda müvekkil-i mezbûr Ahmed Ağa’dan kırk bin akçe karz aldı, biz bu husûsa şâhidleriz, şehâdet dahi ederiz deyû ikrâr-ı şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olup, mûcebiyle meblağ-ı merkūmu metrûkâtından edâya hükm olunup, mâ vaka‘a gıbbe’t-taleb ketb olundu. Tahrîren fi’l-yevmi’s-sânî fî şehri Cemâziyelevvel sene 1027. Şuhûdü’l-hâl: Fahrü’l-kuzât Mehmed Efendi b. Ahmed, Mustafa b. Mehmed, Mustafa b. Ali, Receb b. Yunus, el-Hâc Kadri b. İlyas ve gayruhüm.