İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 203 Hüküm no: 254 Orijinal metin no: [28a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yandro v. Niko’ya, Sarı Yani v. Kosta’ya sattığı koyunlar hususundaki iddiasını ispat etmesi için mühlet verilmesi Zimmî tâ’ifesinden Yandıro v. Niko meclis-i şer‘-i şerîfde Sarı Yani v. Kosta nâm zimmî muvâcehesinde takrîr-i da‘vâ edip, merkūm Sarı Yani’ye her re’si yüz otuz birer akçeye olmak üzre bundan akdem bin altı yüz sekiz koyun bey‘ ve teslîm edip, semeni olan cem‘an iki yüz on bin altı yüz kırk akçeden beş bin akçesini mersûm Sarı Yani yedinden ahz u kabz eyledim, meblağ-ı bâkī iki yüz beş bin altı yüz kırk akçeyi dahi taleb ederim dedikde, gıbbe’s-suâl merkūm Yani cevâbında, müdde‘î-i merkūmdan her re’si yüz yirmi beşer akçeye olmak üzre ancak bin beş yüz otuz koyun iştirâ ve kabz edip ve semeni olan yüz doksan bir bin iki yüz elli akçenin yüz beş bin akçesini müdde‘î-i merkūma teslîm eyledim, seksen altı bin iki yüz elli akçesi hâlâ zimmetimdedir deyip, bin beş yüz otuz koyundan ziyâde iştirâ eyleyip ve her re’sini yüz otuz birer akçeye kabûl ettiğini inkâr edicek, ikrârı mertebesini edâya tenbîh olunup ve müdde‘î-i merkūm Yandıro’nun takrîrine muvâfık beyyine taleb olundukda isbât-ı beyyine için istimhâl etmeğin, mehl-i şer‘î verilip, mâ hüve’l-vâki‘ gıbbe’t-taleb ketb olundu. Tahrîren fî selh-i şehri Rebî‘ilâhir li sene seb‘a ve ışrîn ve elf. Şuhûdü’l-hâl: Mehmed b. Eyüb, Eyüb b. Mehmed, Abdünnebî b. İbrahim, Mustafa b. Cafer ve gayruhüm.