İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 207 Hüküm no: 259 Orijinal metin no: [28b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Bedreddin’in, Şekerci Ahmed Çelebi b. Kaya’da şeker bedelinden olan alacağının varislerinden tahsili İşbu râfi‘ü’l-kitâb Mehmed b. Bedreddin mahfil-i kazâda, mahmiye-i İstanbul’da Büyük Karaman’da sükkerci iken vefât eden Ahmed Çelebi b. Kaya’nın li ebeveyn karındaşı kızı ve alâ vechi’l-inhisâr vârisesi olup, muhallefâtına vâzı‘atü’l-yed olan Esma Hâtun bt. Halil’in zevci ve husûs-ı âti’l-beyâna vekîli olup, bimâ nehcü’s-sübût şer‘an vekâleti sâbite Ali Çelebi b. Ahmed mahzarında takrîr-i kelâm edip, müteveffâ-yı mezbûr Ahmed Çelebi[‘ye] hâl-i hayâtında her vakıyyesi yetmiş akçeye olmak üzre dört yüz doksan akçeye yetmiş vakıyye sükker bey‘ ve teslîm etmiş idim. Hâlâ meblağ-ı merkūma Esma Hâtun vaz‘-ı yed olmağın, merkūme Esma Hâtun’dan taleb ederim dedikde, gıbbe’s-suâl [ve] akībü’l-inkâr, müdde‘î-i mezbûrdan takrîrine muvâfık beyyine taleb olundukda, udûl-i ricâlden Mahmud b. Ömer ve Ömer b. İsa nâm kimesneler mahfil-i kazâya li ecli’ş-şehâde hâzırân olup, gıbbe’l-istişhâd lafzen ve ma‘nen müdde‘î-i mezbûrun da‘vâsına mutâbık edâ-i şehâdet-i şer‘iyye ettiklerinde, ba‘de’t-ta‘dîli’ş-şer‘î mûcebiyle hükm olunup, mâ hüve’l-vâki‘ bi’t-taleb ketb olundu. Hurrire fî evâhiri şehri Rebî‘ilâhir li sene seb‘a ve ışrîn ve elf. Şuhûdü’l-hâl: İsmail b. Abdünnebî, Kadri b. İlyas, Murad b. Mehmed ve gayruhüm.