İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 208 Hüküm no: 262 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Melikşah Hâtun Evkâfı’nın eski mütevelli kaymakamı Musa b. İsmail’in vakfa borcunu ödemesi Merhûme Melikşah Hâtun’un evlâdından olup meşrûtiyyet üzre mütevellîye olan Sâliha Hâtun bt. Haydar Bey husûs-ı âti’z-zikre vekîl olup, mezbûreyi mârifet-i şer‘iyye ile ârifeyn olan İbrahim Efendi b. Mahmud ve Mehmed Efendi b. Ahmed şehâdetleriyle vekâleti sâbite olan es-Seyyid Mehmed Efendi b. es-Seyyid ( ) meclis-i şer‘de mütevellîye-i mezbûrenin sâbıkan kāimmakām olan Musa b. İsmail mahzarında bi’l-vekâle da‘vâ edip merkūm Musa zimmetinde vakf-ı merkūmun asl-ı malından iki bin beş yüz akçe karz olup zimem-i nâsda olan yine vakf-ı mezbûr malının murâbahasından on iki bin akçe cem‘ etmekle hâlâ meblağeyn-i merkūmeyni vekâletim hasebiyle mezbûrdan taleb ederim dedikde gıbbe’s-suâl merkūm Musa cevâbında fi’l-vâki‘ vakf-ı merkūm malından alâ tarîki’l-karz iki bin beş yüz akçe zimmetimde olup ve on iki bin akçe dahi vech-i merkūm üzre murâbahadan cem‘ eyledim hâlâ zimmetimdedir deyû ikrâr etmeğin mûcebince edâsına tenbîh olunup mâ vaka‘a kayd şüd. Hurrire fî 3 min [şehri] Cemâziyelevvel sene [10] 27. Şuhûdü’l-hâl: İbrahim b. Receb, Murad b. Mehmed, Mehmed b. Receb, Mehmed b. Ahmed, Mustafa b. Gülâbî.