İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 209 Hüküm no: 263 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Palamutlu Dağı’nın kullanım hakkının Karacadağlı karyesi halkından olduğu Vilâyet-i Rumeli’nde Ermiye kasabası sâkinlerinden Zülfikar Efendi b. Umur Bey ve Osman Çelebi b. Keyvan Çavuş meclis-i şer‘de, kasaba-yı mezbûre tevâbi‘inden Karacadağlı nâm karye ahâlîsinden Ali Bey ve Abdülcelîl b. Ali ve İsa b. Hamza nâm kimesneler mahzarlarında takrîr-i kelâm ve ta‘bîr ani’l-merâm edip, karye-i mezbûre kurbunda vâki‘ hudûdunun bir tarafı Depe nâm mevzi‘den Kovanlık deresi demekle ma‘rûf mevzi‘a, ondan Kızılgökçel’de Gersin Kayası nâm mevzi‘a, ondan Konak demekle ma‘rûf mevzi‘den Adatepe’ye ondan Sünbüllüce nâm mevzi‘a müntehî olup, Palamutlu Dağı demekle ma‘rûf dağ kadîmden karye-i mezbûre ahâlîsinin odunluğu ve mer‘âsı iken, kasaba-i mezbûre ahâlîsi fuzûlen eşkincilerini gönderip odununu kestirip ve sığırlarını ve koyunlarını ve atlarını ve develerini zikr olunan mer‘âda otlatıp, birkaç sene tasarruf etmişler idi. Ba‘dehû cümle kasaba-i mezbûre ahâlîsi zikr olunan karye ahâlîsinin tapunâmeli ve hüccetli odunlukları ve mer‘âları olup, min ba‘d alâka ve medhalimiz yokdur deyû ikrâr edip, ba‘de’l-yevm zikr olunan dağın odununu kesmeyip ve mer‘âsında sığırların ve koyunların otarmamaya müte‘ahhid olmuşlar idi. El-hâletü hâzihî biz dahi zikr olunan dağda alâka ve medhalimiz olmadığını mu‘terif olup, ba‘de’l-yevm oduncularımıza odun kestirmemeye ve sığırlarımız ve koyunlarımız ve sâir hayvanâtımız otarmamaya müteahhid olduk dediklerinde, gıbbe’t-tasdîk ketb olundu. Tahrîren fi’l-yevmi’s-sâlis min [şehri] Cemâziyelevvel [sene seb‘a ve ışrîn ve elf.] Şuhûdü’l-hâl: Osman Efendi b. Ali, Mahmud Çelebi b. Behrâm Çavuş, Mustafa Çelebi b. Veli, Yusuf Çelebi b. Mustafa Bey, Abdülcelîl Bey, Ali b. Turgut ve gayruhüm.