Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 148 Hüküm no: 119 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vekaleten Dülbentçi Hüsam Mahallesi mescidi imamlığı vazifesini yürüten Mehmed Efendi’nin ibkası Mahmiye-i İstanbul’da hâliyâ Dülbendci Hüsam mahallesi mescid-i şerîfi ve ma‘bed-i latîfinin imâmı olan Süleyman b. Halil Efendi nâm sagīrin kıbel-i şer‘-i şerîfden mansûb vasîsi olan Hüseyin Bey b. Mehmed nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda sagīr-i mezbûrun vazîfe-i mu‘ayyenesi ile hizmet-i imâmetini görmeğe mukaddemâ kıbel-i şer‘-i enverden kāimmakām nasb u ta‘yîn olan Mehmed Efendi nâm kimesne mahzarında takrîr-i da‘vâ ve tasvîr-i müdde‘â edip sagīr-i mezbûrun üveyi babası olup imâmete ehil olan işbu hâzır bi’l-meclis Mustafa Efendi b. Ali nâm kimesne sagīr-i mezbûrun hizmet-i imâmeti bilâ-vazîfe imâmete ta‘ahhüd etmeğin suâl olunup sagīr-i mezbûra enfa‘ olmağla mezbûr Mehmed Efendi azl ve merkūm Mustafa kāimmakām nasb olunmak matlûbumdur dedikde gıbbe’s-suâl mezbûr Mehmed Efendi ben dahi ba‘de’l-yevm sagīr-i mezbûrun hizmet-i imâmetini ba‘de’l-yevm bilâ-vazîfe teberru‘ân ederim demekle mezbûr Mehmed Efendi sagīr-i mezbûrun kāimmakāmlıkda hizmet-i imâmetini ba‘de’l-yevm bilâ-vazîfe teberru‘an etmek üzere sagīr-i mezbûrun kāimmakāmlı[ğın]da ibkā olunmağın mâ-vaka‘a bi’t-taleb ketb olundu. Fi’l-yevmi’l-ışrîn min-Cemâziyelâhir li-sene ihdâ ve semânîn ve elf. Şuhûdü’l-hâl: Mehmed Ağa [b.] Mustafa, Halil [b.] Abdullah, İbrahim [b.] Abdullah, İbrahim [b.] Salih, İbrahim [b.] Hüseyin.