Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 147 Hüküm no: 118 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’ye olan borcunu ödemesi hususunda Arslan Çavuş’a tenbihte bulunulması Efendi hazretleri imzâsıyladır. Mahmiye-i İstanbul’da Mirâhur mahallesi sükkânından bâ‘isü hâze’l-kitâb Mehmed Efendi b. İbrahim nâm kimesne meclis-i şer‘-i şerîfde Arslan Çavuş b. Hasan nâm kimesne mahzarında üzerine da‘vâ ve takrîr-i kelâm edip umdetü’l-emâsil ve’l-eşbâh Gümrük Emîni Mustafa Ağa deyn-i şer‘îden karındaşım Ali Efendi zimmetinde hakkı olan yetmiş yedi bin sekiz yüz akçeyi bundan akdem taleb etdiğinde meblağ-ı mezbûra emr ü kabûlü hâvî kefâlet ile ben kefîl olup ve mezbûr Arslan Çavuş meblağ-ı mezbûru tahsîl için üzerime mübâşir ta‘yîn olmağla mûmâ-ileyh Mustafa Ağa’nın vekîli Hüseyin Ağa’ya teslîmi için mezbûr Arslan Çavuş’a yetmiş bin akçe def‘ ü teslîm ve mezbûr Arslan Çavuş dahi ahz u kabz edip hattâ mezbûr Arslan Çavuş meblağ-ı mezbûr yetmiş bin akçeyi vech-i muharrer üzere yedinden kabzını ikrâr etdikden sonra meblağ-ı mezbûr altmış sekiz bin akçesini mezbûr Hüseyin Ağa’ya def‘ ü teslîm edip bâkī iki bin akçesini teslîm etmeyip bi-gayr-ı hakkın mesârifine sarf etmekle suâl olunup meblağ-ı bâkī-i mezbûrun mezbûr Arslan Çavuş’dan alıverilmesi matlûbumdur dedikde gıbbe’s-suâl mezbûr Arslan Çavuş cevâbında müdde‘î-i mezbûrdan vech-i muharrer üzere ancak altmış sekiz bin akçe alıp ziyâde almamış iken yetmiş bin akçe aldım deyü iki bin akçe [25a] kâziben ikrâr etmiş idim dedikde, müdde‘î-i mezbûra merkūm Arslan Çavuş’a vech-i muharrer üzere kabzını i‘tirâf etdiği yetmiş bin akçenin altmış sekiz bin akçesinden ziyâde iki bin akçesini ikrârında kâzib olmayıp kendi dahi ziyâde mezbûra iki bin akçe da‘vâsında mubtıl olmadığına yemîn teklîf olundukda müdde‘î-i mezbûr dahi merkūm Arslan Çavuş’a ziyâde-yi mezbûre iki bin akçenin dört yüz akçesinden mâ‘adâsı olan bin altı yüz akçeyi ikrârında kâzib olmayıp kendi dahi bin altı yüz akçe da‘vâsında mubtıl olmadığına yemîn billâhi’l-aliyyi’l-a‘lâ etmeğin mûcebince meblağ-ı mezbûr bin altı yüz akçeyi müdde‘î-i mezbûra teslîm ve edâya merkūm Arslan Çavuş’a tenbîh olunmağın mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Hüddâm