İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 210 Hüküm no: 265 Orijinal metin no: [29a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey Vakfına ait boş arsanın Fazlullah Efendi’ye kiraya verilmesi Mahmiye-i İstanbul’da Kara Emin demekle ma‘rûf olan merhûm Mehmed Bey vakfına bi’l-fi‘il mütevellî olan Derviş Çelebi b. Emrullah meclis-i şer‘-i şerîfde sevk-i kelâm edip, vakf-ı mezbûrdan olup mahmiye-i merkūmede Ahî Çelebi mahallesinde vâki‘ bir tarafı Kalaycı Üstâd Hüseyin dükkânına ve bir tarafı vakf-ı mezbûra ve bir tarafı mefharü’l-kuzât Fazlullah Efendi mülküne mülâsık olup, tûlen yirmi zirâ‘ ve arzen buçuk zirâ‘ olan arz-ı hâliyeye mûmâ-ileyh Fazlullah Efendi mukāta‘a ile tâlib olmağın, kıbel-i şer‘den üzerine varılıp arz-ı mezbûre ne mikdâr akçe mukāta‘aya mütehammildir ta‘yîn olunmak taleb ederim dedikde, savb-ı şer‘de Mevlânâ Mahmud Efendi irsâl olunup, hâssa mi‘mârlardan Üstâd Mustafa b. Abdullah ve Ali Bey b. Abdullah ve zeyl-i kitâbda mastûrü’l-esâmi olan bî-garaz Müslimîn ile mahall-i mezbûra varıp müşâhede ettiklerinde, zikr olunan arz-ı hâliyenin yılda otuz beş akçeye mütehammildir meblağ-ı merkūm tamamen ecr-i misildir deyû mi‘mârân-ı mezbûrân ve sâir bî-garaz Müslimîn ihbâr ettiklerini, mevlânâ-yı mezbûr mahallinde tahrîr ve mahfil-i kazâda takrîr ettikden sonra mütevellî-i mezbûr zikr olunan arz-ı hâliyeyi târih-i kitâb Safer gurresinden yılda otuz beş akçe mukāta‘a ile müşârun-ileyh Fazlullah Efendi’ye mukāta‘aya verdiğine i‘tirâf edip, ol dahi tasdîk ettikde, mâ hüve’l-vâki‘ ketb olundu. Tahrîren fî evâili Cemâziyelevvel li sene seb‘a ve ışrîn ve elf. Şuhûdü’l-hâl: Ali Beşe b. Abdullah er-râcil, Ali Halîfe b. Mustafa el-imâm, Mehmed Efendi b. Mehmed, Ramazan Efendi b. Hamza ve gayruhüm.