İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 211 Hüküm no: 266 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yemişçilerin gelen yemiş/zahire gemilerini kayıklarıyla karşılamaması Mahmiye-i İstanbul’da ve etrâfında vâki‘ yemişçiler tâ’ifesinden pazarbaşıları Mehmed b. Ahmed ve Mustafa b. Abdullah ve Hasan b. Nasrullah ve Süleyman b. Mustafa ve Ömer b. Mahmud ve Hamza b. İbrahim ve el-Hâc Himmet b. el-Hâc Hüseyin ve el-Hâc Ahmed b. (...) ve el-Hâc İbrahim b. Mehmed ve es-Seyyid Mahmud b. Hüseyin ve İbrahim Nasûh ve Süleyman b. Hüdâverdi ve es-Seyyid Ahmed b. Mustafa ve Yusuf [b.] İmâleddin ve Seyyid Ahmed Çelebi b. Seyyid Mustafa ve sâirleri meclis-i şer‘-i kavîm-i lâzımü’t-tekrîmde hâzırûn olup, bast-ı kelâm edip, taşradan yemiş ve gemisi geldikde pazarbaşımız ma‘rifetiyle beynimizde tevzî‘ olunup kayık ile karşılanı gelmiş değil iken, hâlâ olıgelene muhâlifi’l-hurûf ba‘zımız kayıkları ile taşradan gelen gemiye karşılamak ile fukarâya hisse değmeyip küllî zarara? bâ‘is olmağın, cümle şöyle ittifâk eyledik ki, pazarbaşı ve kethüdâlarımızın ma‘rifetleri yoğiken her kangımız taşradan gelen sefîneyi kayık ile karşılayıp zahîre alırsa, şer‘le hakkından gelinip muhkem te’dîb oluna ve eğer te’dîb ile zabt [edilmesin] mümkün [değil] ise kayıklarımız ihrâk olunmak üzre terâhî ve tevâfuk eyledik, vech-i meşrûh üzre olan ittifâkımız tahrîr olunup, yedimize def‘ olunmak taleb ederiz dediklerinde, fî nefsi’l-emr hırfet-i mezbûre ahâlîsi minvâl-i muharrer üzre zabt olunmağın, nice fesâda müeddî olur deyû sâir bî-garaz ve ehl-i vukūf Müslimîn ihbâr eylemeğin, olıgelene muhâlif kayık ile zahîre gemisi karşılanmamak için kıbel-i şer‘den tenbîh olunup, mâ hüve’l-vâki‘ gıbbe’t-taleb ketb olundu. Tahrîren fî evâili [şehri] Cemâziyelâhir sene seb‘a ve ışrîn ve elf. Şuhûdü’l-hâl: Mustafa Ağa b. Abdülmu‘în Reîsü’l-muhzırîn, Mustafa Bâşe çukadâr, Himmet b. Mehmed, Murad b. Mehmed ve gayruhüm.