İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 211 Hüküm no: 267 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şemse bt. Ali’nin vefat eden eşi Hacı Hüseyin b. Ali’deki alacağının terekesinden ödenmesi Mahmiye-i İstanbul’da Kasab İlyas mahallesinde mukaddemâ vefât eden el-Hâc Hüseyin b. Ali’nin zevce-i metrûkesi ve vârisesi hâmiletü’l-kitâb Şemse bt. Ali mahfil-i kazâda, müteveffâ-yı mezbûrun sulbiye kebîre kızları ve vâriseleri Rahime ve Emine nâm hâtunlar muvâcehelerinde takrîr-i da‘vâ edip, müteveffâ-yı mezbûrun zimmetinde deyn-i şer‘îden üç bin akçem ve bin akçe mehr-i müeccelim olup hâlâ muhallefâtından taleb ederim dedikde, gıbbe’s-suâl ve akībü’l-inkâr ve’l-istişhâdi’ş-şer‘î udûl-i Müslimînden Mehmed Efendi b. Mustafa el-imâm ve İbrahim b. Yusuf el-müezzin li ecli’ş-şehâde meclis-i şer‘a hâzırân olup, istişhâd olunduklarında, fi’l-hakīka müdde‘iyye-i mezbûrenin müteveffâ-yı mezbûr zimmetinde deyn-i şer‘îden üç bin akçe ve bin akçe mehr-i müeccelini ikrâr etmişdir. Bu husûsa şâhidleriz, şehâdet dahi ederiz deyû edâ-i şehâdet-i şer‘iyye edip, şehâdetleri hayyiz-i kabûlde vâki‘ oldukdan sonra mezbûre Şemse zikr olunan meblağı hâl-i hayâtında müteveffâ-yı mezbûrdan küllen-ev-ba‘zan ahz u kabz ve hibe etmeyip, taraf-ı şer‘iyyeden bir tarîkle zimmetini ibrâ etmediğine yemîn teklîf olundukda, alâ vefki’l-mes’ûlihâ yemîn billâhi’l-aliyyi’l-azîm ettikden sonra mübelligeyn-i merkūmeyn müteveffâ-yı mezbûrun muhallefâtından müdde‘iyye-i mezbûreye hükm olunup, mâ hüve’l-vâki‘ bi’t-taleb ketb olundu. Tahrîren fî evâhiri şehri Rebî‘ilâhir li sene seb‘a ve ışrîn ve elf. Şuhûdü’l-hâl: Abdülkādir b. Abdünnebî, Ahmed b. Hasan, Süleyman b. Mustafa, Mehmed b. Abdullah, Ahmed b. Mehmed ve gayruhüm.