İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 212 Hüküm no: 269 Orijinal metin no: [29b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Efendi b. Ebûbekir’in, Nasûh b. Yusuf’daki kira bedelinden alacağını tahsili Mahmiye-i İstanbul’da Âşık Paşa mahallesinde sâkin hâfız hâze’l-kitâb fahrü’l-kuzât Abdurrahman Efendi b. Ebûbekir meclis-i şer‘-i şerîfde, Nasûh b. Yusuf mahzarında takrîr-i da‘vâ edip, mahalle-i mezbûrede inde’l-ahâlî ma‘lûmü’l-hudûd mülk menzilimi her sene dört yüz seksen akçeye olmak üzre târih-i kitâbdan üç sene mukaddem merkūm Nasûh’a îcâr edip, cem‘an ücret-i menzilden zimmetinde üç senede bin dört yüz yirmi akçe müctemi‘ olup, meblağ-ı mezbûrdan altı yüz akçesin merkūm Nasûh yedinden ahz u kabz edip, bâkī zimmetinde sekiz yüz yirmi akçe hakkım kalmışdır taleb ederim dedikde, gıbbe’s-suâl merkūm Nasûh cevâbında, fi’l-hakīka hâl minvâl-i meşrûh üzredir, lâkin mezbûr Abdurrahman Efendi zikr olunan menzili kendi mâlın ile ta‘mîr eyle, ne mikdâr meblağ sarf edersen icâreye mahsûb edeyim demeğin, emri ile menzil-i merkūma beş yüz akçe sarf eyleyip ve bir def‘a dahi beş yüz akçe teslîm eyledim deyip, merkūm Abdurrahman Efendi inkâr edicek merkūm Nasûh’un takrîrine muvâfık beyyine taleb olundukda, ityân-ı beyyineden izhâr-ı acz edip istihlâf etmeğin, ol dahi menzil-i merkūmun meremmetine sarf eylediği meblağı icâreye mahsûb edeyim deyû izin vermediğine ve mârrü’z-zikr olan altı yüz akçeden mâ‘adâ beş yüz akçe merkūm Nasûh’dan ahz u kabz eylemediğine yemîn billâhi’l-aliyyi’l-azîm eylemeğin, meblağ-ı bakī sekiz yüz yirmi akçenin edâsına hükm olunup, mâ vaka‘a bi’t-taleb ketb olundu. Hurrire fi’l-yevmi’l-hâmis min [şehri] Cemâziyelâhir sene seb‘a ve ışrîn ve elf. Şuhûdü’l-hâl: Abdünnebî b. İbrahim, Mustafa b. Kelâmî, Yusuf b. Mustafa, Âdem b. Hüsam.