.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 214
Hüküm no: 272
Orijinal metin no: [30a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kavga eden Selim b. Abdullah ve Mehmed Efendi’yi kendilerine müdahale eden Yeniçeri Mustafa Beşe b. Ali’yi önlemesi

Mahmiye-i İstanbul’da Sarmaşık mahallesine hıfz için ta‘yîn olunan yeniçeri tâ’ifesinden hâmilü’l-kitâb Mustafa Beşe b. Ali er-râcil mahfil-i kazâda, Selim b. Abdullah nâm siyah Arabı ve Mehmed Efendi nâm lâ-ya‘kıl bir dânişmendi ihzâr ve mezbûr Selim mahzarında takrîr-i da‘vâ edip, mezbûrân Selim ve Mehmed Efendi birkaç refîkleri ile mahalle-i mezbûrede vâki‘ mefharü’l-emâcid ve’l-ekârim müctemi‘u’l-mehâmid ve’l-mekârim bi’l-fi‘il Reîsülküttâb olan Mecid Efendi’nin bahçesi kapısı önüne gelip, elbette bize şarap verin deyû kavga eylediklerinde, ben dahi men‘ etmek murâd eylediğimde, mezbûr Selim ensemi ve mezbûr Mehmed Efendi sağ yanımı bürüm ile urup mecrûh eylediklerinden sonra üç bin akçe kıymetli bir üsküfüm ve beş yüz akçe kıymetli bir kol değneğim kavgada zâyi‘ oldu deyip, mezbûr Mustafa’nın a‘zâsına nazar olundukda fi’l-hakīka takrîrine muvâfık başında ve yanında mecrûh idiği [mu‘âyene] olundukdan sonra mezbûr Mehmed Efendi’nin nutka mecâli olmayıp, a‘zâsına nazar olundukda, mezbûrun dahi alnında ve burnunda mecrûh idiği mu‘âyene olunup mezbûr Selim’den istintâk olundukda, dânişmend efendiler ile merkūm Mustafa Beşe yoldaşları ile kavga edip yedi yerin urdular dedikde, mâ vaka‘a bi’t-taleb ketb olundu. Tahrîren fi’l-yevmi’s-sâdis min [şehri] Cemâziyelevvel li sene 1027.


Şuhûdü’l-hâl: Fahrü’l-müderrisîn Süleyman Efendi, Fahrü’l-müderrisîn Mehmed Efendi, Fahrü’l-kuzât Receb Efendi, Mehmed Çelebi b. Ahmed, Hacı Ali b. Abdullah, Ali b. Abdullah, Mehmed b. Cafer, Mehmed b. Cafer ve gayruhüm.