İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 215 Hüküm no: 273 Orijinal metin no: [30a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkadir b. Mehmed Halife’nin kiracısı olduğu Mimar Murad Vakfı’na ait evi Hacı Süleyman b. Ali’ye devretmesi Mahmiye-i İstanbul’da Karakız mahallesi sâkinlerinden mefharü’l-müderrisîn Abdülkādir Efendi b. Mehmed Halife meclis-i şer‘de, işbu hâfızu’l-kitâb el-Hâc Süleyman b. Ali muvâcehesinde ikrâr ve ta‘bîr ani’l-merâm edip, -merhûm ve mağfûrun leh- Mi‘mâr Murad vakfından olup mahalle-i mezbûrede vâki‘, üç tarafdan merkūm Şeyh Resmî Vakfı ile ve bir tarafdan tarîk-i âm ile mahdûd olan biri tahtânî ve biri fevkānî iki bâb odaları müştemil olan menzilin icâre-i müeccelesi Şeyh Resmî mahallesi mescidinde müezzin olan kimesneye meşrûta olan menzilde ayda kırk akçe ücret-i müeccele ile sâkin olup, bundan akdem menzil-i mezkûr harâbe müşrif oldukda izn-i şer‘le kendi mülküm olmak üzre mâlımdan ba‘zı mevâzi‘in tecdîd ve ba‘zı yerlerin ta‘mîr etmiş idim. Hâlâ mezbûr el-Hâc Süleyman yedinden zikr olunan binâm mukābelesinde altı bin nakd-i râyic fi’l-vakt akçe ahz u kabz edip, menzil-i mezkûru mütevellîsi olan Ahmed Çelebi ma‘rifetiyle mezbûr el-Hâc Süleyman’a fâriğ oldum dedikde, mukırr-ı mezbûrun vech-i meşrûh üzre ikrârın merkūm el-Hâc Süleyman bi’l-muvâcehe tasdîk edicek, mâ hüve’l-vâki‘ gıbbe’t-taleb ketb olundu, tâlibi yedine def‘ olundu. Hurrire fi’l-yevmi’r-râbi‘ min [şehri] Cemâziyelevvel li sene seb‘a ve ışrîn ve elf. Şuhûdü’l-hâl: Mahmud Efendi, Halil Efendi, Derviş b. Çelebi, Hayyât Mehmed, İbrahim, Ahmed Çelebi, el-Hâc Mehmed ve gayruhüm.