İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 216 Hüküm no: 275 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Hasan’ın duvarına komşusu Ahmed Çelebi b. Abdullah’ın müdahale etmemesi Mahmiye-i İstanbul’da Molla Gürânî mahallesi sâkinlerinden râfi‘ü hâze’l-kitâb Ali Çelebi b. Hasan meclis-i şer‘-i şerîfde takrîr-i kelâm edip, mahalle-i mezbûrede vâki‘ benim mülk menzilim ile câr-ı mülâsıkım olan Ahmed Çelebi b. Abdullah’ın mülk menzili beyninde kadîmden müşterek bir mikdâr duvar var idi. Mezbûr Ahmed Çelebi müşterek olan duvardan gayri benim mülküm olan taş duvarımı tasarruf eder, kıbel-i şer‘den ehl-i hibre ile üzerine varılıp ba‘de’l-müşâhede mezbûr Ahmed Çelebi’ye tenbîh-i şer‘î kılınmak taleb ederim dedikde, savb-ı şer‘-i kavîmden Mevlânâ Mahmud Efendi ve hâssa mi‘mârlardan Üstâd Ali Bey b. Abdullah irsâl olunup, zeyl-i kitâbda mastûrü’l-esâmi olan Müslimîn ile mahall-i mezbûra varıp, merkūm Ahmed Çelebi muvâcehesinde nazar edip, mi‘mâr-ı mezbûr münâza‘un-fîh duvarı mesâha ettikde, mütehâsımân-ı mezbûrânın yedlerinde olan hüccet-i şer‘iyyeleri mûcebince müşterek olan duvar bi hesâb-ı şatrancî on iki zirâ‘ eski kerpiç duvardır, işbu mücedded taş ile binâ olunan yirmi beş zirâ‘ duvar müdde‘î-i mezbûr Ali Çelebi’nin mülküdür (mülkündür), mezbûr Ahmed Çelebi’nin aslâ alâka ve medhali yokdur, emârât-ı kadîmesi mersûm Ali Çelebi mülkündür olmağa delâlet eder deyû, mi‘mâr-ı mezbûr sâir ahâlî-i Müslimîn ittifâkıyla haber verdikde, mevlânâ-yı mezbûr mesfûr Ahmed Çelebi’ye müşterek olan kerpiç duvardan gayri müdde‘î-i merkūmun mülkü olan yirmi beş zirâ‘ taş duvara müdâhale etmemek üzre tenbîh ettikden sonra, vâki‘ hâli mahallinde tahrîr ve mahfil-i kazâda ihbâr ve takrîr etmeğin, mâ hüve’l-vâki‘ bi’t-taleb ketb olundu. Hurrire fi’t-târihi’l-mezbûr. Şuhûdü’l-hâl: Süleyman Dede b. Yusuf, Hüseyin Bey b. Abdullah er-râcil, Mustafa b. Hamza, Ali Çavuş b. Mahmud.