İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 215 Hüküm no: 274 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Kethüdâ b. Abdülmümin’in dükkân yerini Ali Ağa b. Ahmed Reis’e satması Vilâyet-i Rumeli’nde Hersek sancağında vâki‘ Kal‘a-i Nova-i Atîk ahâlîsinden olan Hasan Kethüdâ b. Abdülmümin nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda, hâlâ donanma-yı hümâyûn ağası olan işbu sâhibü’l-kitâb kıdvetü’l-emâcid ve’l-ekârim câmi‘u’l-mehâmid ve’l-mekârim Ali Ağa b. Ahmed Reis tarafından tasdîk-i âti’z-zikre hasm-ı şer‘î-i câhid mahzarında, Hüseyin b. Ali Kethüdâ ve Hasan Kethüdâ b. Ahmed Ağa şehâdetleri ile şer‘an vekâleti sâbite olan Veli Ağa b. Pervâne mahzarında ikrâr ve i‘tirâf edip, kal‘a-i mezbûre dâhilinde vâki‘ bir cânibi mûmâ-ileyh Ali Ağa mülkü ile ve bir tarafı dahi Kılıçcı Ebûbekir ve Ferhad dükkânları ile ve iki tarafı dahi tarîk-i âm ile mahdûd olan mülk dükkân yerimi müşârun-ileyh Ali Ağa’ya on bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip, kabz-ı semen-i merkūm etdim dedikde, mukırr-ı mezbûrun ikrâr-ı meşrûhun vekîl-i merkūm dahi bi’l-muvâcehe tasdîk edicek, mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min [şehri] Cemâziyelâhir sene seb‘a ve ışrîn ve elf. Şuhûdü’l-hâl: Zülfikar Çavuş, el-Hâc Hasan Kethüdâ, Hüseyin, Mustafa.