İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 218 Hüküm no: 279 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Münife bt. Abdullah’ın evini ve bağını İskender Bey b. İsmail’e sattığı Gelibolu kazâsına tâbi‘ Nikofti nâm karye sâkinelerinden Münîfe bt. Abdullah nâm hâtun meclis-i şer‘-i şerîf-i şâmihü’l-imâdda, işbu râfi‘ü’l-kitâb İskender Bey b. İsmail er-râcil muvâcehesinde ikrâr ve i‘tirâf edip, karye-i mezbûrede vâki‘ bir tarafı Ramazan Beşe b. İskender mülkü ile ve bir tarafı dahi Nasûh b. Hasan mülkü ile ve bir tarafı dahi Ali Bâli mülkü ile ve bir tarafı dahi tarîk-i âm ile mahdûd olup, iki fevkānî ve iki tahtânî evleri ve bir sofayı ve bir kuyuyu ve bir fırını ve bir kenîfi müştemil olan mülk menzilimi ve karye-i mezbûrede vâki‘ bir tarafı müşterî-i mezbûr mülkü ile ve bir tarafı dahi Mustafa Bey b. Cafer mülkü ile ve bir tarafı dahi tarîk-i âm ile ve taraf-ı râbi‘i vâdi ile mahdûd olan mülk bağımı, mezbûr İskender Bey’e safka-i vâhide ile kırk bin nakd-i râyic fi’l-vakt akçeye bey‘-i bâtt-ı kat‘î ile bey‘ edip, kabz-ı semen-i mesfûr ettikden sonra mezbûr İskender Bey’i mebî‘ân-ı mezbûrânın tesellümüne taslît etdim dedikde, mukırra-i mezbûrenin ikrârın müşterî-i mesfûr dahi bi’l-muvâcehe tasdîk edicek, mâ vaka‘a [bi’t-taleb] ketb olundu. Tahrîren fi’l-yevmi’s-sâlis min [şehri] Cemâziyelevvel li sene seb‘a ve ışrîn ve elf. Şuhûdü’l-hâl: Es-Sâbikūn.