İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 219 Hüküm no: 281 Orijinal metin no: [31a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali’nin, ölen Hüseyin b. Abdullah’taki alacağının varislerden tahsil edilmesi Mahmiye-i İstanbul’da Âşık Paşa mahallesinde sâkin iken vefât eden Hasan Çavuş b. Mahmud nâm kimesnenin sulbî oğlu Ali nâm sagīrin kıbel-i şer‘-i şerîfden mansûb vasiyy-i şer‘îsi olan Ömer, umdetü’l-ulemâ’i’l-kirâm Cafer Efendi b. Mahmud tarafından husûs-ı âti’z-zikre Rıdvan b. Abdullah ve Hasan b. Abdullah şehâdetleri ile şer‘an vekâleti sâbite olan aynü’l-a‘yân Osman Çavuş b. Mahmud meclis-i şer‘-i şerîfde, bundan akdem mahmiye-i mezbûrede Neslişah Sultan mahallesinde sâkin iken vefât eden Hüseyin b. Abdullah nâm kimesnenin vârisleri olup, menzil-i âti’l-beyâna vaz‘-ı yed ettikleri şer‘an sâbite olan sulbî oğulları Mehmed ve Ahmed ve İbrahim mahzarlarında bi’l-vekâle takrîr-i da‘vâ edip, mezbûrların babaları müteveffâ-yı merkūm Hüseyin bin on üç senesi Saferi’nin evâhirinde mahmiye-i mezbûrede zikri sebk eden Neslişah Sultan mahallesinde vâki‘ bir tarafı Hasan b. Abdullah mülküne ve bir tarafı Behrâm Kethüdâ mülküne ve bir tarafı Hayyât Mahmud mülküne ve bir tarafı tarîk-i hâssa müntehî olan mülk menzilini, sagīr-i mezbûr mâlı ile müvekkilim mûmâ-ileyh Cafer Efendi’ye on iki bin akçeye istiğlâl tarîkiyle bey‘ ve teslîm-i mebî‘ ve kabz-ı semen ettikden sonra, yine menzil-i mezbûru târih-i merkūmdan bir sene tamamına değin bin iki yüz akçeye istîcâr etmiş idi. Ba‘de zamân mezbûr Hüseyin fevt oldukda, zevce-i metrûkesi ve merkūmların vâlideleri Dilaram bt. Abdullah nâm hâtun yedinden meblağ-ı mezbûr asl-ı mâldan beşer bin akçe ve âhara ücret-i misli olan beş yüz akçe, müvekkilim mûmâ-ileyh Cafer Efendi vesâyeti hasebiyle ahz u kabz edip, asl-ı mâldan ve icâreden yedi bin yedi yüz akçe bâkī kalmış idi. Hâlâ merkūmûn Mehmed ve Ahmed ve İbrahim’den taleb ederim deyip, târih-i mezbûr ile müverrah ve mahmiye-i mezbûrede sâbıkan nâ’ibü’ş-şer‘ olan Musa Efendi b. Zekeriya [tarafından] mümzât ve hâtemi ile mahtûme hüccet ibrâz edip, nazar olundukda takrîrine muvâfık bulunup, mezbûrlara suâl olundukda, mazmûn-ı hücceti bi’l-külliye inkâr eylediklerinde, vekîl-i mezbûrdan mazmûn-ı hüccete [muvâfık] beyyine taleb olundukda, zeyl-i kitâbda mastûrü’l-esâmi olan Müslimînden Hamza Efendi b. el-Hâc Derviş ve Ali b. Üveys nâm kimesneler meclis-i şer‘a li ecli’ş-şehâde hâzırân olup, istişhâd olunduklarında, fi’l-hakīka müteveffâ-yı merkūm Hüseyin hudûd-ı mezbûr ile mahdûd olan mülk menzili târih-i mezbûrda sagīr-i mezbûr mâlı ile vasiyy-i mûmâ-ileyhe on iki bin akçeye istiğlâl tarîkiyle bey‘ ve teslîm ettikden sonra, yine târih-i mezbûrdan bir sene tamamına değin bin iki yüz akçeye istîcâr edip, nâ’ib-i mûmâ-ileyh huzûrunda hüccet olundu idi. Bu vech üzre hüccet-i merkūmenin mazmûnuna şâhidleriz, şehâdet dahi ederiz deyû edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri hayyiz-i kabûlde vâki‘ oldukdan sonra, mûcebiyle meblağ-ı mezbûr yedi bin yedi yüz akçenin edâsına hükm olunup, mâ vaka‘a bi’t-taleb ketb olundu. Hurrire fi’l-yevmi’s-sâlis min [şehri] Cemâziyelevvel sene seb‘a ve ışrîn ve elf. Şuhûdü’l-hâl: Mustafa b. Hamza, Hasan b. Abdülkādir el-mülâzım, Ahmed b. İdris, Rıdvan b. Abdullah, diğer Rıdvan b. Abdullah [es-]sarrâc, Feridun Efendi el-kadı, (...), Sâlih Beşe Kırımî? er-râcil.