Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 149 Hüküm no: 121 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin vakıf menzil ve müştemilatını İbrahim b. Mehmed’e satması Mahmiye-i İstanbul Hısnı ebvâbından Cibali Kapısı kurbünde Üskübî mahallesi sükkânından İbrahim Çelebi b. Hasan nâm kimesne meclis-i şer‘-i şerîfde el-Hâc İbrahim b. Mehmed er-Reşîdî mahzarında ikrâr ve takrîr-i kelâm edip tefvîz-i câi’z-zikrin sudûruna değin taht-ı tasarrufumda olup mahalle-i mezbûrede vâki‘ merhûm Kiremidçizâde Pir Mehmed Çelebi Evkāfı’ndan olup senede vakf-ı mezbûra iki yüz kırk akçe mukāta‘ası olup üç tarafı merhûm-ı mezbûrun vakfı odaları ve bir tarafı tarîk-i âm ile mahdûd iki bâb fevkānî oda ve bir bâb tahtânî oda ve altında bir bakkāl dükkânı ve kenîfi müştemil olan vakıf menzilimi izn-i mütevellî ile mezbûr el-Hâc İbrahim’e otuz beş bin akçe bedel mukābelesinde ferâğ ve tefvîz, ol dahi tefevvüz ve kabûl etdiğinden sonra bedel-i mezkûr otuz beş bin akçeyi mezbûr el-Hâc İbrahim yedinden bi’t-tamâm ahz u kabz eyledim min-ba‘d menzil-i mezkûr-ı mahdûd-ı mezkûr merkūm el-Hâc İbrahim’in hakk-ı müfevvezidir emsâli gibi mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Mustafa Çelebi b. Mehmed kâtib-i vakıf, Mehmed b. Ömer câbî-i vakf-ı mezbûr, Ali …?-ı vakıf, Mustafa b. Abdullah, Mehmed Efendi b. Abdullah, Ahmed Azvî, İbrahim Çelebi b. Ahmed, Mustafa Çelebi b. el-Hâc Ahmed.