Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 149 Hüküm no: 122 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Takyeci Mahmud Beşe’nin Kırküçüncü Ağabölüğü Para Vakfı’na olan borcunun varislerinin ödemesi Hüccet-i istiğlâl Mahmiye-i İstanbul’da Dergâh-ı âlî yeniçerilerinin Kırküç Ağabölüğü’nün nukūd-ı mevkūfesine bi’l-fi‘il mütevellî olan işbu râfi‘ü’l-kitâb Şahin Odabaşı nâm kimesne meclis-i şer‘-i şerîfde mahmiye-i mezbûrede Şahsultan mahallesinde sâkin olup bundan akdem vefât eden Takyeci Mahmud Beşe’nin terekesine vâzı‘ateyi’l-yed olan li-ebeveyn kız karındaşı Fâtıma bt. Osman ile zevce-i metrûkesi Âişe bt. Ömer nâm hatunlar mahzarlarında üzerlerine da‘vâ ve takrîr-i kelâm edip merhûm Mehmed Beşe târîh-i kitâbdan yirmi sene mukaddem hâl-i hayâtında vakf-ı mezbûra sâbıkā mütevellî olan gāib ani’l-meclis el-Hâc Hüseyin Beşe nâm kimesneye üç bin akçe mukābelesinde mahalle-i mezbûrede vâki‘ bir tarafdan Hasan b. Murad menzili ve bir tarafdan el-Hâc Mustafa menzili ve bir tarafdan İlyas Beşe menzili ve bir tarafı tarîk-i âm ile mahdûd mülk menzilini bi-tarîkı’l-istiğlâl bey‘ ve teslîm ol dahi mâl-ı vakf-ı mezbûr ile iştirâ ve tesellüm ve def‘-i semen edip yine ba‘de’t-tahliyeti’ş-şer‘iyye menzil-i mezbûru târîh-i mezkûrdan beher sene yüzelli akçeye müteveffâ-yı mezbûra îcâr ve teslîm, ol dahi ba‘de’l-istîcâr ve’t-tesellüm ücret-i menzil-i mezkûru beher sene taraf-ı vakf-ı mezkûra teslîm edip lâkin mebî‘-i mezkûr rehin ma‘nâsına olmağın asl-ı mâl-ı vakf-ı mezbûru edâ etmeyip fekk-i rehin etmeden vefât etmekle meblağ-ı mezbûr zimmetinde kalmağın hâlâ tevliyetim hasebiyle asl-ı mâl-ı vakf-ı mezbûru muhallefâtına vaz‘-ı yed eden mezbûretân Fâtıma ve Âişe’den <> taleb ederim suâl olunsun dedikde gıbbe’s-suâl mezbûretân Fâtıma ve Âişe müteveffâ-yı mezbûrun muhallefâtına vaz‘-ı yed eylediklerini ikrâr ve deyn-i mezkûru inkâr edicek mütevellî-yi mezbûr Şahin Odabaşı’dan da‘vâsına mutâbık beyyine taleb olundukda udûl-ı Müslimînden olup oda-i mezbûr ahâlîsinden Hüseyin Beşe b. Ali ve Mehmed Beşe b. Mustafa nâm kimesne li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Takyeci Mahmud Beşe hâl-i hayâtında târîh-i mezbûrda mütevellî-yi sâbık el-Hâc Hüseyin Beşe’ye menzil-i mezbûru üç bin akçeye bi-tarîkı’l-istiğlâl bey‘ ve teslîm ve kabz-ı semen, ol dahi mâl-ı vakf-ı mezbûr ile vech-i muharrer üzere iştirâ ve tesellüm edip ba‘de’t-tahliyeti’ş-şer‘iyye yine mütevellî-yi mezbûr menzil-i mezbûru târîh-i mezbûrdan beher sene yüz elli akçeye müteveffâ-yı mezbûra îcâr ve teslîm, ol dahi istîcâr ve tesellüm eylemiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a olup mûcebince merkūmetân Fâtıma ve Âişe’ye meblağ-ı mezbûr üç bin akçeyi edâ ve mütevellî-yi mezbûra teslîme tenbîh olundu. mâ-vaka‘a bi’t-taleb ketb olundu. Fi’s-sâbi‘ ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Mustafa b. el-Hâc Ahmed, Şükrullah Bey b. Mustafa, Abdi Çelebi b. Mustafa, Hüseyin b. Ebubekir