İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 222 Hüküm no: 285 Orijinal metin no: [31b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc İlyas Kaftanî mescidi evkâfı’na ait paranın işletilmesine izin verildiği Mahmiye-i Kostantıniyye’de vâki‘ merhûm el-Hâc İlyas Kaftânî mescidi evkāfı’na hâlâ mütevellî olan işbu râfi‘ü’l-kitâb fahrü’l-akrân Çâker Çavuş b. Abdullah meclis-i şer‘-i şerîf-i şâmihü’l-imâdda, takrîr-i kelâm ve ta‘bîr ani’l-merâm edip, vakf-ı mezbûrun hâlâ seksen iki bin beş yüz elli akçesi mevcûd olup ve vezâifi her bir senede on bir bin kırk akçe olup, meblağ-ı mezbûrun onu on bir hesâbı üzre istirbâh olunmağla, rub‘u vezâif-i mezbûreye kifâyet eylemez, mescid-i mesfûr mahallesi ahâlîsinden istihbâr olunup, onu on bir buçuk hesâbı üzre istirbâh olunmağa kıbel-i şer‘-i şerîfden izin taleb ederim dedikde, gıbbe’l-istihbâr mahalle-i mezbûreden Muharrem Efendi b. Musa ve Abdullah Bey b. Şemseddin ve Abdi b. Himmet ve Şükrullah Efendi b. Kasım nâm kimesneler ve cemm-i gafîr ve cem‘-i müşîr meclis-i şer‘a li ecli’l-ihbâr hâzırûn olup, fi’l-vâki‘ nukūd-ı mezbûrenin onu on bir hesâbı üzre beher sene hâsıl olan rub‘u vezâifine kifâyet eylemez deyû ihbâr eylediklerinde, minvâl-i meşrûh üzre meblağ-ı mezbûr onu on bir buçuk hesâbı üzre istirbâh olunmağa izin verilip, mâ vaka‘a ketb olundu. Fi’l-yevmi’s-sânî min [şehri] Cemâziyelevvel sene seb‘a ve ışrîn ve elf. Şuhûdü’l-hâl: Alâaddin Efendi b. Hamza el-imâm, İbrahim b. Receb, Mustafa serbölük, Hasan Çelebi b. Ahmed, Osman b. Mustafa, Murad b. Mehmed.