İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 221 Hüküm no: 284 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia Hâtun bt. Musa’nın, eski eşi Abdullah b. Mehmed’de mehir alacağını tahsil ettiği Mahmiye-i İstanbul’da Arabacılar mahallesi sâkinelerinden Râbia Hâtun bt. Musa meclis-i şer‘-i şerîfde, zevc-i sâbıkı hâmilü’l-kitâb Emrullah b. Mehmed mahzarında ikrâr ve takrîr-i kelâm edip, târih-i kitâbdan dört yıl mukaddem ben sagīre iken vâlidem Yasemin bt. Abdullah beni mezbûr Emrullah’a dört bin akçe mehr-i müeccel ile tezvîc edip, ba‘dehû üç aydan sonra mezbûr Emrullah benimle muhâla‘a etmiş idi. Hâlâ bâliğa olmağın mehr-i müeccelim olan meblağ-ı merkūm dört bin akçeyi taleb eylediğimde, mezbûr Emrullah mehr-i müeccelin bin beş yüz akçedir ve hîn-i muhâla‘ada bâliğa idin demekle, beynimizde münâza‘ât-ı kesîre ve muhâsemât-ı şedîde ve hatîre vâkı‘a olmuş idi. El-hâletü hâzihî husûs-ı mezkûru tavassut-ı muslihîn ile bin akçeye sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı merkūm bin akçeyi mezbûr Emrullah yedinden alıp kabz edip, husûs-ı mezkûra müte‘allik cemî‘-i de‘âvîden zimmetin[i] ibrâ-i âm ile ibrâ ve ıskāt-ı tâm ile ıskāt etdim dedikde, mezbûre Râbia Hâtun’un vech-i merkūm üzre sudûr eden ikrârın mezbûr Emrullah dahi vicâhen ve şifâhen tasdîk etmeğin, mâ hüve’l-vâki‘ ketb olundu. Tahrîren fi’l-yevmi’s-sâlis min [şehri] Cemâziyelevvel min şuhûri sene seb‘a ve ışrîn ve elf. Şuhûdü’l-hâl: Osman Çavuş el-mübâşir, Mehmed Çavuş kapıcıbaşı, Mehmed Ağa Mirahor, Nasûh Bey el-müteferrika, Mehmed b. Cafer, Ahmed b. Ömer, Osman b. Abdullah, Ramazan b. Abdullah ve gayruhüm.