İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 223 Hüküm no: 287 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hümâ Hâtun vakfına ait menzilin icâreteyn yoluyla Mehmed Çelebi b. Behrâm’a kiralanması Dârü’s-saltanati’l-aliyye Kostantıniyye el-mahmiyyede vâki‘ merhûm Bâli Paşa hâtunu merhûme Hümâ Hâtun vakfına bi’l-fi‘il mütevellî olan fahrü’l-a‘yân Mehmed Efendi b. ( ) mahfil-i kazâda, fahrü’l-emsâl Mehmed Çelebi b. Behrâm mahzarında ikrâr-ı tâm ve takrîr-i kelâm edip, vakf-ı mezbûrda yine mahalle-i mezbûrede vâki‘ muhavvata-i hâriciyesi beş fevkānî ve üç tahtânî odaları ve matbah ve ahûr ve tahta-pûş ve eşcâr-ı ve muhavvata-i dâhiliyesi beş fevkānî ve üç tahtânî oda ve matbah ve hamam ve eşcâr-ı ve iki çeşmeyi müştemil olup, bir tarafı Mehmed Bey mülkü ve bir tarafı Çâşnigir vakıfı ve bir tarafı vakf-ı mezbûr ve bir tarafı tarîk-i âm ile mahdûd menzil, icâre-i mu‘accele ve müeccele ile müste’cir ve mutasarrıfı olan sâbıkan İstanbul Kadısı Mustafa Efendi merhûm olup, evlâdı kalmayıp vakfa âid olup, mezbûr Mehmed Çelebi tâlib olmağın, kırk bin akçe icâre-i mu‘accele ve günde dokuz akçe ücret-i müeccele ile menzil-i merkūmu mezbûr Mehmed Çelebi’ye îcâr eyledim, ol dahi istîcâr edip, meblağ-ı merkūm kırk bin akçe îcâre-i mu‘acceleyi vakıf için yedinden alıp kabz eyledim dedikde, mütevellî-i mezbûrun ikrârın mersûm Mehmed Çelebi vicâhen tasdîk ettikde, mâ vaka‘a [ketb olundu]. [Tarih yazılmamıştır]. Şuhûdü’l-hâl: Fahrü’l-müderrisîn Hamdi Çelebi, Mehmed Çelebi el-müderris, Abdürrahim Çelebi el-müderris, Hüseyin Çelebi el-mülâzım.