İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 231 Hüküm no: 299 Orijinal metin no: [33b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. İlyas’ın el koyduğu araziyi Nasûh b. Gazi’nin çocuklarına geri vermesi Vilâyet-i Rumeli’nde Malkara kazâsına tâbi‘ Kalaycı nâm karyeden olup, mukaddemâ vefât eden Nasûh b. Gāzi’nin sulbî oğulları ve bi’l-inhisâr vârisleri Yusuf ve Mehmed ve Maden nâm sagīrin kıbel-i şer‘den mansûbe vasîleri ve vâlideleri olan Raziye bt. Yusuf mahfil-i kazâda, zümre-i râcilînden dördüncü bölükden Mehmed Beşe b. İlyas muvâcehesinde takrîr-i da‘vâ edip, karye-i merkūme sınırında vâki‘ ind-i ahâli’d-diyâr ma‘lûmü’l-hudûd ve’l-mikdâr sıgār-ı mezbûrîne babaları müteveffâ-yı mersûmdan tasarrufu intikāl eden arâzîyi, mersûm Mehmed Beşe bi gayri vech-i şer‘î zabt edip, sagīrlere küllî zulm olmuşdur, suâl olunup kasr-ı yed etmesi taleb ederim dedikde, gıbbe’s-suâl mezbûr Mehmed Beşe cevâbında, zikr olunan arâzî merhûm Gāzi Süleyman Paşa Evkāfı’ndan olup, bundan esbak vakf-ı merkūm tarafından karye-i merkūmenin zâbiti olan Uzunzâde Mehmed Çavuş’dan arâzî-yi mezkûre mahlûledir deyû tapulayıp almış idim deyû, vaz‘-ı yed eylemiş idim. El-hâletü hâzihî müteveffâ-yı merkūm benden bi’l-iştirâ mukaddem arâzî-yi mezkûreyi mûmâ-ileyh Mehmed Çavuş’dan tapulayıp hak müteveffâ-yı merkūmun olduğu ma‘lûmum olmağın, hâlâ arâzî-yi mezkûrenin tasarrufundan kasr-ı yed edip, zikr olunan arâziye müte‘allik da‘vâdan sıgār-ı mezbûrûnun zimmetlerin ibrâ ve ıskāt eyledim. Ba‘de’l-yevm benden asâleten ve yahud vekîlimden vekâleten husûs-ı mezbûra müte‘allik da‘vâ ve nizâ‘ sâdıre olursa, lede’l-hükkâmi’l-kirâm mesmû‘a ve makbûle olmaya deyicek, mâ vaka‘a bi’t-taleb ketb olundu. Hurrire fi’l-yevmi’s-sâmin min [şehri] Cemâziyelevvel li sene 1027. Şuhûd[ü’l-hâl]: Osman b. Abdullah er-râcil, Mehmed Beşe b. Ahmed er-râcil odabaşı, Mehmed Beşe b. Nasûh er-râcil, Mehmed b. Ömer.