İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 231 Hüküm no: 300 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vezir Mahmud Paşa hâslarından Tutrakan hassına dâhil iki köyün gelirlerinin İbrahim Çavuş’a iltizâm edildiği Düstûr-ı mükerrem müşîr-i mufahham nâzım-ı menâzımü’l-âlem vezîr-i bî-nazîr Mahmud Paşa hazretlerinin hâslarından vilâyet-i Rumeli’nde Niğbolu sancağında vâki‘ Rahova kazâsında olan Tutrakan? hâssı voyvodası olan fahrü’l-akrân Hasan Ağa b. Abdülmennân meclis-i şer‘-i şerîfde, işbu râfi‘ü’l-kitâb İbrahim Çavuş b. Süleyman mahzarında ikrâr ve takrîr-i kelâm edip, vezîr-i müşârun-ileyhin zikr olunan hâssı tevâbi‘inden kazâ-i mezbûrda vâki‘ taht-ı tasarrufumda olan Alice ve Toyrotive? nâm karyelerin bin yirmi yedi senesinde bana â’id olan hukūk ve rusûmunu, sene-i mezbûrede vâki‘ Mart ibtidâsından sene tamamına değin, mezbûr İbrahim Çavuş’a otuz bin akçeye der-uhde edip, meblağ-ı merkūm otuz bin akçeyi mezbûrun yedinden ber vech-i peşîn alıp kabz etdim dedikde, mukırr-ı mezbûrun ikrârın merkūm İbrahim Çavuş dahi bi’l-muvâcehe tasdîk edicek, mâ vaka‘a ketb olundu. Tahrîren fi’l-yevmi’s-sânî aşer min Cemâziyelevvel min şuhûri li sene seb‘a ve ışrîn ve elf. Şuhûd[ü’l-hâl]: Hasan Çavuş b. Pervâne, Mustafa Çelebi b. Süleyman el-cündî, Kadızâde Çelebi, Sefer Çelebi, Hüseyin Yazıcı, Mehmed Bey.