|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 233 Hüküm no: 303 Orijinal metin no: [33b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ölen Hasan Ağa’nın, Mehmed Beşe’ye verdiği ödüncün, kızı Râbia Hâtun’un tahsil ettiği
Mahmiye-i İstanbul’da İskender Paşa mahallesinde vefât [eden] merhûm Hasan Ağa’nın veresesinden sulbiye kızı Râbia Hâtun tarafından ikrâr-ı âti’z-zikre vekîl olup, mahzar-ı hasm-ı câhidde mezbûreyi ma‘rifet-i şer‘iyye ile ârifeyn olan Mehmed b. Mustafa ve Zülfikar b. Abdülkādir şehâdetleri ile şer‘an vekâleti sâbite olan Abdullah çelebi b. eş-Şeyh Salim meclis-i şer‘-i şerîfde, işbu râfi‘ü’l-kitâb Mehmed Beşe b. Rüstem mahzarında bi’l-vekâle ikrâr-ı tâm ve takrîr-i kelâm edip, bundan akdem müteveffâ-yı merkūm mezbûr Mehmed Beşe’ye bi tarîki’l-karz doksan bin akçe verip, ol dahi kabz [ve] zimmetinde iken mezbûr Hasan Ağa vefât edip, meblağ-ı merkūm Râbia’nın hisse-i şer‘iyyesine â’ide olmuş idi. El-hâletü hâzihî müvekkilem mezbûre Râbia Hâtun meblağ-ı merkūm doksan bin akçeyi mezbûr Mehmed Beşe yedinden bi tamâmihî alıp kabz edip, meblağ-ı merkūm doksan bin akçeden zimmetini berîdir dedikde, mezbûr Abdullah Çelebi’nin vekâlet-i mahkiyesi hasebiyle sudûr eden ikrârın mezbûr Mehmed Beşe vicâhen tasdîk edicek, mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min Cemâziyelevvel li sene seb‘a ve ışrîn ve elf. Şuhûd[ü’l-hâl]: Ömer Halife b. Mehmed, Mustafa b. Abdi, Mehmed b. Mustafa. Hasan b. Mustafa, Mehmed b. Ahmed, Ahmed Çelebi b. Hasan, Ali b. er-râcil, el-Hâc Mustafa, Ali Çelebi el-Yesârî, Hüseyin b. Mustafa.
|