İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 234 Hüküm no: 306 Orijinal metin no: [34a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Abdullah’ın, Ali Bey b. Abdullah’a olan borcunu varisi Ömer Çelebi’ye ödediği Dârü’s-saltanati’l-aliyye mahmiye-i Kostantıniyye’de vâki‘ merhûm el-Hâc Hüseyin mahallesinde, bundan akdem vefât eden Ali Bey b. Abdullah’ın sulbî kebîr oğlu [ve] bi’l-inhisâr vârisi olan Ömer Çelebi meclis-i şer‘de, Mustafa Bey b. Abdullah nâm râcil muvâcehesinde takrîr-i da‘vâ edip, babam müteveffâ-yı merkūmun mersûm Mustafa Bey zimmetinde karz-ı şer‘îden kırk beş bin akçe ve mahmiye-i merkūme hısn-ı ebvâbından Yedikule kapısı hâricinde vâki‘ merhûm Rüstem Paşa vakfından inde’l-cîrân ma‘lûmü’l-hudûd olup icâre-i mu‘accele-i ma‘lûme ve ücret-i müeccele-i mu‘ayyene ile müteveffâ-yı merkūmun hâl-i sıhhatinde tasarrufunda olup, merkūm Mustafa Bey îcâr eylediği bir bâb ekmekci fırınının îcâresinden elli bin akçe hakkı olup ve fırın-ı mezbûru îcâr etdiğinde mevcûd olup, babam müteveffâ-yı merkūmun mülkü olan merkūm Mustafa Bey’e teslîm eylediği habbâz âlâtından, bir kazgan-ı kebîr ve dört tas ve iki kantâr ba‘de’l-vefât irs-i şer‘le bana intikāl etmeğin, meblağeyn-i merkūmeyni ve eşyâ-i mezbûreyi merkūmdan taleb ederim dedikde, gıbbe’s-suâl merkūm Mustafa cevâbında, fi’l-vâki‘ müteveffâ-yı merkūmun, zimmetimde karz-ı şer‘îden kırk beş bin akçe ve fırın îcâresinden elli bin akçe hakkı var idi. Lâkin ba‘de’l-vefât meblağeyn-i merkūmeynin cümlesini merkūm Ömer Çelebi benden bi’t-tamâm istîfâ ve kabz edip ve eşyâ-i merkūme da‘vâsından zimmetimi ibrâ ve ıskāt eylediği mahmiye-i merkūmede sene erba‘a ve ışrîn ve elf Ramazan-ı şerîfi’nin yirmi beşinci gününde Davud Paşa mahkemesinde nâ’ibü’ş-şer‘ olan Ahmed b. Behrâm huzûrunda mersûm Ömer Çelebi muvâcehesinde hüccet-i şer‘iyye olunmuşdur deyip, nâ’ib-i mezbûr imzâsıyla mümzât ve hâtemi ile mahtûme târih-i mezbûr ile müverraha mazmûnu takrîrine muvâfık hüccet-i şer‘iyye ibrâz edip, merkūm Ömer’den istintâk olundukda, fi’l-vâki‘ hüccet-i merkūme benim muvâcehemde olmuşdur deyû mazmûn-ı hücceti i‘tirâf etmeğin, bî-vech mu‘ârazadan men‘ olunup, mâ vaka‘a bi’t-taleb ketb olundu. Hurrire fi’l-yevmi’s-sâmin min Cemâziyelevvel li sene seb‘a ve ışrîn ve elf. Şuhûd[ü’l-hâl]: Ahmed Çelebi b. İlhami, Mehmed b. Ahmed, Mehmed b. Cafer, Mehmed b. Hızır el-imâm, Mehmed b. Şaban er-râcil, Budak Subaşı, Yusuf b. Ömer el-müezzin, Nurullah b. Lütfullah el-müezzin, Mehmed Çelebi b. Mustafa el-müezzin, Osman b. Mahmud el-müezzin.