İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 234 Hüküm no: 305 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Abdullah’ın Kurt v. Panpir’e verdiği ödünç parayı geri aldığı Şaban b. Abdullah nâm kimesne mahfil-i kazâda, râfi‘ü’l-kitâb Kur v. Panpir nâm zimmî mahzarında ikrâr ve takrîr-i kelâm edip, bundan akdem mezbûr Kurt zimmetinde karz-ı şer‘îden kırk bin akçe ve beynimizde ilm-i şer‘î ile mikdâr ve levni ma‘lûm çuka bahâsından dört bin akçe, cem‘an kırk dört bin akçe hakkım olup, ba‘dehû mezbûr Kurt beynimizde mikdârı ma‘lûm keteni ve vasıfları ma‘lûm üç re’s bârgiri ve iki kıt‘a velençeyi ve vasıfları ma‘lûm esâs-ı beyti bana safka-i vâhide ile kırk iki bin beş yüz akçeye bey‘ ve tesl[î]m edip, ben dahi ibtiyâ‘ ve tesellüm edip, zimmetinde ba‘de küllî hesâb bin beş yüz akçe hakkım kalmışdı. El-hâletü hâzihî meblağ-ı merkūm bin beş yüz akçeyi dahi zimmî-i mezbûr Kurt’dan alıp kabz edip, meblağ-ı merkūm kırk dört bin akçeden zimmetinde hakkım kalmadı dedikde, mezbûr Şaban’ın vech-i meşrûh üzre sudûr eden ikrârın mezbûr Kurt vicâhen tasdîk etmeğin, mâ hüve’l-vâki‘ gıbbe’t-taleb ketb olundu. Hurrire fî evâili şehri Rebî‘ilâhir li sene seb‘a ve ışrîn ve elf. Şuhûd[ü’l-hâl]: Mustafa b. Kelâmî, Himmet b. Mustafa, Osman b. Abdullah, Eyüb b. Mehmed ve gayruhüm.