İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 236 Hüküm no: 309 Orijinal metin no: [34b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun’un evinde fuhuş yaptırması Dârü’s-saltanati’s-seniyye Kostantıniyye el-mahmiyye mahallâtından Yenibahçe kurbunda merhûm Mi‘mâr Sinan mahallesi sâkinelerinden Dellâl Receb zevcesi demekle meşhûre olan Fâtıma Hâtun’un hâli, mahalle-i mezbûre ve sâir mukaddemâ sâkine olduğu mahallât ahâlîsinden istifsâr olunmak bâbında, düstûr-ı mükerrem müşîr-i mufahham nâzım-ı menâzımü’l-âlem mütemmim-i mehâmm-ı cumhûrîn-i âdem vezîr-i bî-nazîr müşîr-i müşterî-tedbîr kāimmakām-ı vezâret-i uzmâ ve müttekâ-yı sadâret-i kübrâ olan Mehmed Paşa hazretleri taraf-ı fâ’izü’ş-şerîflerinden buyruldu-yı şerîf vârid oldukda, mezbûrenin sâbıkan sâkine olduğu Defterdâr Ahmed Çelebi mahallesi ahâlîsinden Şaban Halife b. Mustafa el-imâm ve Mehmed b. Halil el-müezzin ve Ahmed [b.] Abdullah el-hallâk ve Piyâle b. Abdullah el-kasab ve Ramazan [b.] Ahmed ve Mi‘mâr Sinan mahallesi ahâlîsinden Mehmed b. İbrahim el-imâm ve Mahmud el-müezzin ve Cafer el-kasab nâm kimesneler ve cemm-i gafîr ve cem‘-i kesîr meclis-i şer‘-i şerîfe ihzâr olunup, gıbbe’l-istihbâr, fi’l-vâki‘ mezbûre Fâtıma Hâtun evine her gece nâ-mahrem ricâl getirip fısk u fücûr üzre olduğu sebebden Defterdâr Ahmed Çelebi mahallesi ahâlîsi şikâyet etmeğin, mahalle-i mezbûrede vâki‘ mülk menzili cebren bey‘ ettirilmiştir ve mezbûre Fâtıma dâimâ fuhuş ve zinâ üzredir ve bundan esbak mahmiye-i mezbûrede fevâhiş teftîş olunup, mezbûre Fâtıma’nın ahvâli suâl olundukda, mahallesi ahâlîsi dâimâ fısk u fücûr ve nâ-mahremler ile mu‘âmele ve mu‘âşeret üzredir deyû ihbâr ettiklerinde, ahz olunmak murâd olundukda firâr eyleyip, beyti tesmîr olundukda gece ile ön duvarın hedm eyleyip esbâbın ihrâc ve âhar mahallede ihtifâ eylediği muhakkak olup ve Sofular mahallesi ahâlîsinden el-Hâc Halil Efendi b. Habil nâm kimesne dahi meclis-i şer‘-i şerîfe li ecli’l-ihbâr hâzır olup, fi’l-vâki‘ mezbûre Fâtıma Hâtun dâimâ nâ-mahrem ricâl ile mu‘âmele eyleyip fısk u fücûrdan hâliye olmayıp, fısk u fücûra ısrâr ve idmânı meşhûrdur deyû ihbâr eyledikde, vâki‘ hâl zabten li’l-makāl mübâşiri olan İbrahim Çavuş talebi ile ketb olundu. Tahrîren fi’l-yevmi’s-sânî aşer min Cemâziyelevvel li sene seb‘a ve ışrîn ve elf. Şuhûd[ü’l-hâl]: Fahrü’l-müsta‘idîn Derviş Efendi b. Mehmed, Fahrü’l-mülâzimîn Mahmud Çelebi, Mustafa Beşe, Mustafa Ağa, Hasan b. Ahmed, Ahmed Efendi, Yusuf Çavuş, Murad b. Mehmed ve gayruhüm.