İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 238 Hüküm no: 311 Orijinal metin no: [34b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Avraham’ın, Peşver v. Avraham’dan alacağının kaldığı Mayer? cemâ‘atinden Salamon v. Avraham nâm Yahudi mahfil-i kazâda, Sinore? cemâ‘atinden hamilü’l-kitâb Peşver v. Avraham nâm Yahudi mahzarında üzerine da‘vâ edip, mezbûr Peşver zimmetinde deyn-i şer‘îden yüz on yedi bin akçem vardır taleb ederim dedikde, gıbbe’s-suâl mezbûr Peşver cevâbında, fi’l-hakīka vech-i merkūm üzre zimmetimde yüz on yedi bin akçe mezbûr Salamon’a deynim olup, mezbûr beni habs ettirmekle, mezbûr on pastav Londiri çukası ve iki yüz yirmi beş zirâ‘ atlası, yüz iki bin akçe mukābelesinde verip, zimmetimde on beş bin akçe kalıp ve vech-i merkūm üzre zikr olunan çuka ve atlas yüz iki bin akçe mukābelesinde alıp kabz edip, zimmetimde on beş bin akçe kaldığına mahzar-ı şuhûdda hattâ ikrâr dahi etmişdir deyicek, gıbbe’l-inkâr ve akībü’l-istişhâd Alman cemâ‘atinden Mosi v. Yasef ve İrgör? cemâ‘atinden Abraham v. Katadan nâm Yahudiler li ecli’ş-şehâde mahfil-i kazâda hâzırlar olup istişhâd olunduklarında, fi’l-vâki‘ mezbûr [Salamon v.] Abraham bizim huzûrumuzda mezbûr Peşver zimmetinde deyn-i şer‘îden olan yüz on yedi bin akçenin yüz iki bin akçesine on pastav Londiri çukası ve yüz yirmi beş zirâ‘ atlas alıp, zimmetinde on beş bin akçe hakkım kaldı deyû i‘tirâf etti. Mezbûr Salamon’un bu vech üzre i‘tirâfına şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, gıbbe’t-tezkiye şehâdetleri makbûle oldukdan sonra, mûcebiyle hükm birle mâ vaka‘a ketb olundu. Tahrîren fi’l-yevmi’s-sânî min Cemâziyelevvel li sene seb‘a ve ışrîn ve elf. Şuhûd[ü’l-hâl]: Ali Çavuş el-mübâşir, Abdi Çelebi el-kâtib, Mehmed b. Ömer, Osman b. Abdullah, Mustafa Bölükbaşı b. Osman, Ömer Çelebi b. Mustafa, Hüsrev b. Osman.