İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 239 Hüküm no: 313 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayakkabıların satılacağı arastalar ve ayakkabı imalinin eski usule göre devam etmesi için, haffâflara tenbihde bulunulması Dârü’s-saltanati’s-seniyye Kostantıniyye el-mahmiyyede vâki‘ Karaman-ı kebîr kurbunda olan Arasta Kethüdâsı Hasan Çelebi b. Sefer ve Ahmed b. Mustafa ve Hüseyin b. Abdullah ve Muharrem Bey ve Osman Bey ve Mehmed Bey ve Hasan Çavuş b. İbrahim ve sâir mahmiye-i mezkûrede olan haffâflar mahfil-i kazâda, cennet-mekân firdevs-âşiyân merhûm Sultan Ahmed Hân -aleyhi’r-rahmeti ve’r-rıdvân- hazretleri câmi‘-i şerîfi kurbunda olan Cedîd Arasta kethüdâsı Ömer Çelebi b. Ali ve Sefer b. Hasan ve Mehmed Bey b. Receb ve sâir haffâflar mahzarlarında takrîr-i kelâm ve bast-ı merâm edip, mezbûrlar Saraylı demekle ma‘rûf ayakkabı kendi arastamızda bey‘ olunup âhar arastada bey‘ olunmaya deyû emr-i âlî ibrâz edip, biz dahi sizin arasta hâdis olup bizim arastamız kadîm olmakla ayakkabının envâ‘ı onda bey‘ oluna gelmiş değildir deyû nizâ‘ etmiş idik. El-hâletü hâzihî mezbûrların arastasında ütülü beyaz mest ve papuç ve ütülü alaca mest ve papuç ve ütülü hevâyî mest ve papuç ve darçini zenne papuç ve beyaz basma papuç ve mest ve her rengin kaytanlısı ve ütülüsü ve gülgûnî papuç ve mest ve nârencinin on yaşından yukarısı bey‘ olunup, bizim arastamızda umûmen çizme ve merdâne ve zenne iç edik ve tomak ve postal ve filar ve kabadi papuç ve âsumânî ve kırmızı ve sarı ve âsumânî köhne papuç ve mest on yaşına varınca ve nârencinin on yaşından aşağısı bey‘ olunup, ba‘de’l-yevm beynimizde münâza‘a ve mu‘âraza olmamak üzre kavl ü karâr eyledik deyip, onlar dahi bi’l-muvâcehe tasdîk eylediklerinden sonra zikr olunan kethüdâlar ve haffâflar i‘âde-i kelâm edip, kadîmü’l-eyyâmdan yeniçeri papucu kebkebli ve ökçesi ve köselesi ve gönü muhkem olup ve merdâne saray papucu taban astarı sahtiyân ve nârin olup ve kırmızı beylik papuç kösele taban astarlı ve sıra kebkebli ve ökçesi ve dikisi muhkem olup ve sıra kebkebli, gül kebkebli yerinde olagelmiş iken, şimdi ba‘zı dikiciler kadîmden dikilene muhâlif işleyip ayakkabı iştirâ eden Müslimîne zararı olmakla, kadîmü’l-eyyâmdan işlene geldiği üzre işlenip, min ba‘d tağyîr etmemek için işbu mahalde hâzır olan haffâflara ve kethüdâlara kıbel-i şer‘den tenbîh olunmak taleb ederiz dediklerinde, alâ vefk-i mes’ûlihîm tenbîh olunup, mâ vaka‘a bi’t-taleb ketb olundu. Tahrîren fî evâili Cemâziyelevvel li sene seb‘a ve ışrîn ve elf. Şuhûd[ü’l-hâl]: Hasan Çelebi b. ( ), Yusuf Bey b. Abdullah, Mustafa Bâşe Çukadâr, Süleyman Efendi el-müsta‘id, el-Hâc Mahmud.